Mbrojtësi dhe kapiteni i Borusias së Dortmundit, Mats Hummels, ka përfunduar dje transferimin për te Bajerni i Mynihut, duke nënshkruar një kontratë që do ta mbajë atë për pesë vite te bavarezët.
Palët do ta arrinin marrëveshjen që dy javë të shkuara, edhe pse më herët Hummels do të ngurronte ta pohonte një lëvizje të tillë.
Hummels ka qenë një lojtar kyç për Borusian e Dortmundit, dhe bëhet futbollisti i tretë i tillë që në pak vite ndjek të njëjtën rrugë. Mario Goetze dhe Robert Lewandowski do ta linin gjithashtu Borusian për t’iu bashkuar Bajernit të Mynihut.
I rritur si futbollist te Bajerni i Mynihut, Hummels do të kalonte në janar të 2008-ës në radhët e Borusias së Dortmundit. Ai e ka fituar dy herë Bundesligën me Borusian, siç ka fituar dhe Kupën e Gjermanisë.
“E kemi forcuar ekipin tonë me një mbrojtës qendre të klasit botëror,” ka deklaruar shefi ekzekutiv i Bajernit të Mynihut, Karl-Heinz Rummenigge. /tesheshi.com/
