Edi Reja, trajneri italian i kombëtares shqiptare e ka kaluar “lehtë” humbjen turpëruese e pa nder ndaj Francës 4-1, duke thënë se pati dhe gjëra të mira te skuadra.
“Diçka pozitive kishte disa ndeshje. Është normale që bëmë disa gabime individuale që sollën dy golat në pjesën e parë. Ishte mungesë vëmendje nga lojtarët. Në disa momente arritëm të dilnim përpara portës. Është normale, Franca na vuri në vështirësi falë cilësive që ka. Gjithsesi skuadra jonë diçka pozitive e tregoi në ndeshjen e sotme”, tha Reja pas ndeshjes.
Ndërkohë, Roshi, nga i cili u pësuan dy gola prej gabimeve të tij, i vendosur në një pozicion jo në natyrën e lojës së tij, tha: “Kemi bërë një ndeshje jo të mirë, e pranoj që me dy gabimet e mia pësuam dy gola. Të gjithë çunat bënë maksimumin. Duhet të shikojmë ndeshjen e ardhshme, kundër Islandës. Ta harrojmë Francën. Pozicioni? Gjithmonë mua më keni parë në sulm, por sot luajta në mbrojte, për shkak të sistemit. Është e vështirë të luash kundër Francës në atë pozicion”. /tesheshi.com/
