Një video ku shfaqet trajner kosovar i taekwondos Valmir Fetiu, duke goditur një vajzë garuese 8-vjeçare, pasi ajo humbi në finale me një shtetase serbe, e cila është e bija e tij, është konsideruar tejet e rëndë.
Fetiu, duke folur për “Shqipëria Live”, ka sqaruar situatën e pazakontë me vajzën e tij. Ai ka kërkuar falje publikisht dhe u shpreh se goditja ishte për ta kthjelluar, pasi sipas tij, e bija ishte në gjendje shoku pas humbjes.
“Vajza ime ishte në finale me një garuese serbe. Ishte shumë e përgatitur për këtë garë dhe e sigurt për të marrë vendin e parë. Kemi punuar çdo ditë vetëm që vajza ime të shkëlqejë. Në fillim ishte kundër një ukrainase që ishte 10 herë më e mirë se serbja dhe vajza ime e mundi dhe më bëri shumë krenare.
Në pjesën e dytë, vajza ime humbi kundër serbes dhe doli nga kontroll, pasi nuk i pëlqente të humbte prej një serbeje. Nuk e besonte që humbi dhe ishte në shok. Kjo më tmerroi dhe mua më kapën emocionet. E pashë që nuk ishte në vete edhe me majat e gishtave e kam goditur që ta sjell në vete. Unë nuk e mbështes këtë që kam bërë, jam penduar, sidomos ndaj vajzës sime, por i kam rënë që ta kthjelloj. Unë i kërkoj falje së pari vajzës sime dhe më pas gjithë të tjerëve. Duhet të dinë se vetëm unë dhe ajo e dimë çfarë ka ndodhur”, tha ai.
