Matematikisht, mbrëmë Kosova i ka humbur gjasat për t’u kualifikuar në Euro 2020 përmes fazës kualifikuese të grupeve. Kjo pas humbjes nga Republika Çeke 2-1 në ndeshjen e zhvilluar atje.
Përfaqësuesja e Kosovës e ka edhe një takim të fundit në “Fadil Vokrri”, në lojën përballë Anglisë, por pa pritshmëri, pasi si Anglia, ashtu edhe Çekia janë kualifikuar nga Grupi A për në fazat finale të turneut të madh evropian.
Por jo gjithçka ka përfunduar këtu – pretendojnw në disa analiza të tyre mediat kosovare. Kosova nuk i ka humbur të gjitha gjasat për të qenë pjesëmarrëse në Euro 2020 – thonë ato – e kjo për faktin se është fituese e Grupit 3 në Ligën D.
Dhe ja llogaritë: Në Euro 2020 do të marrin pjesë 24 përfaqësuese, 20 prej tyre kualifikohen drejtpërdrejt nga faza kualifikuese duke zënë dy vendet e para në dhjetë grupet. Kështu, Kosova nuk është kualifikuar, pasi Anglia dhe Republika Çeke i kanë zënë dy vendet e para në grupin e saj.
Dhe mbetet mundësia që Kosova të kualifikohet përmes “play-off” në kuadër të Ligës së Kombeve. Ndeshjet e tilla do të zhvillohen në mars të vitit 2020 për t’i plotësuar katër vendet e mbetura. Për dallim nga edicionet e mëparshme, play off-et nuk do të vendosen në bazë të rezultateve në fazën grupore, por në bazë të performancës së tyre në edicionin 2018/2019 në Ligën e Kombeve.
Fituesit e grupeve në Ligën e Kombeve që nuk janë kualifikuar (në këtë rast Kosova si fituese e Grupi 3 në Ligën D) do t’i zhvillojnë dy ndeshje gjysmëfinale dhe një ndeshje finale me fituesit e grupeve tjera në të njëjtën ligë. Mikëpritësi i finales do të vendoset në bazë të shortit.
E gjitha që i duhet përfaqësuese se re është të dalë me rezultat më të mirë ndaj Maqedonisë së Veriut në dy ndeshje gjysmëfinale (si vendase dhe si mysafire) dhe më pas të triumfojë në finale ndaj fituesit të sfidës ndërmjet Gjeorgjisë dhe Bjellorusisë. /tesheshi.com/
