Rezultati i këtyre zgjedhjeve tregon se e vetmja parti që ka shënuar humbje është Partia Demokratike.
Kjo është humbja e dytë e saj e madhe pas vitit 2013.
Në vend që të përmirësonte rezultatin e 4 viteve më parë ajo e thelloi dhe më tej humbjen duke dalë forcë e tretë politike në disa qarqe.
Po çfarë ka ndodhur?
Kjo humbje e së djathtës shqiptare, partia e krijuar pas rënies së regjimit komunist dhe një nga dy partitë më të mëdha në vend, ka nisur në fakt që në vitin 2009, ku pas një fitore të ngushtë në vota dhe mandate, ish-kryetari i saj Sali Berisha bëri një aleancë të shpejtë me një pjesë të së majtës, LSI-në e Ilir Metës.
Marrëveshja e bërë pa u mbyllur numërimi i votave e mbajti dhe 4 vite në pushtet por i shtroi rrugën e tatëpjetës në elektorat.
Faturën e atij mandati qeverisës e mori vetëm PD-ja.
Ndërsa LSI-ja ngrihej dhe shtonte votat nga 80 mijë në 180 mijë në vitin 2013, PD-ja u pakësua po me aq vota.
E njëjta gjë ndodhi dhe në 2017-ën.
LSI dhe pse e vetme në zgjedhje ruajti kuotat e saj, madje duke u rritur më tej si parti, ndërsa PD-ja shënoi një tjetër humbje të madhe, këtë herë me një kryetar të ri në krye, Lulzim Bashën.
Prova e parë në zgjedhje parlamentare e Bashës po rezulton një disfatë e vërtetë dhe po e nxjerr këtë parti, që lindi nga nevoja për ndërtimin e sistemit demokratik pluralist, në një forcë që po lufton për mbijetesë në përfaqësimin e së djathtës shqiptare.
Votuesit shqiptarë të zhgënjyer nga aleanca e 2009-ës e nxorën në opozitë në 2013-ën. Por në 4 vitet që pasuan opozita nuk tentoi të ringrihej, të pastrohej, të riorganizohej, duke e përqëndruar aksionin e saj të vetëm të madh politik në 3 muajt e fundit para fushatës në çadër në bulevard.
Një tjetër marrëveshje me të majtën pas asaj të 2009-ës ndodhi pak para zgjedhjeve, në 18 maj, duke sjellë mesa duket një tjetër zhgënjim tek elektorati i djathtë.
Pasi u takua me Ramën, Basha nuk arriti të përcillte tek elektorati idenë e garës; nuk kuptohej nëse ai garonte me Metën apo me Ramën, apo me askënd.
Gjuha e butë e fushatës dhe përkedhelja e kundërshtarit si nga Basha, si nga Rama, favorizoi këtë të fundit.
Nxjerrja jashtë listave nga ana e Bashës të kastës së vjetër nuk solli rezultatin që ai do të dëshironte. Përkundrazi. Duke pasur mundësinë që të ruanin strukturat e partisë në qarqet e tyre, duke pasur ndikim në elektorat deri në momentin që dolën nga lista, të përjashtuarit punuan për humbjen e PD-së si hakmarrje personale ndaj Bashës.
Mjafton të shohim rezultatin e Shkodrës, ku u la jashtë Jozefina Topalli dhe në prag të zgjedhjeve dha dorëheqjen kreu i degës. Vota e Shkodrës, djepit të së djathtës, që e nxjerr PD-në në minorancë tregon një shuplakë me votën kundër ose me bojkotin e zgjedhjeve.
Ndaj sot kemi këtë rezultat që i thërret opozitës dhe jo qeverisjes, siç mund të pritej në çdo zgjedhje normale.
Në vend që të ndëshkohej qeverisja, ajo u votbesua me një shumëzim votash, ndërsa opozita u ndëshkua për mungesë fryme, për mungesë organizimi dhe për për mungesë koherence me kundërshtarët./tesheshi.com/
