Kur PSG fitonte 4-0 ndaj Barcelonës në Champion League më 14 shkurt, askush nuk besonte se për katalanasit kishte sërish dritë në tunel. Por më 8 mars ndodhte mrekullia në “Camp Nou”, teksa vinte fitorja 6-1 dhe Barcelona eliminonte skuadrën kampione të Francës.
Barcelona ndodhet përsëri në të njëjtën pikë. Vërtet humbja në ndeshjen e parë çerekfinale ndaj Juventusit në Torino është e përmasave më të vogla, 3-0, ama kundërshtari është i përmasave ku e ku më të mëdha. Nëse i shënon gjashtë gola PSG-së, vështirë të bësh kështu me Juventusin. Veçse Barcelona mbetet e tillë, Barcelona!
Në Torino, Juventusi do t’i bënte një nisje më të mirë ndeshjes, me një gol të Dybala-së që në minutën e 7-të.
I njëjti lojtar shënon në minutën e 22-të, por momenti kyç i ndeshjes ishte veç pak përpara këtij goli, kur Buffon do të priste mrekullisht një top të gjuajtur shumë teknikisht nga Iniesta.
Pak presion në pjesën e dytë, dhe Chiellini do të ishte shënuesi i golit të tretë në minutën e 55-të. Më tej do të ishin katalanasit që do ta qarkullonin dendur topin, pa qenë në gjendje të konkretizojnë në asnjë rast.
Barcelona do të provojë më 19 prill ta përmbysë humbjen 3-0. /tesheshi.com/
