I fundit ekip që do të mbizotëronte në Ligën 1 të Francës pati qenë Olimpiku i Lionit, që në nisje të dekadës së shkuar do ta fitonte shtatë herë titullin.
Një dekadë më vonë do të ishte PSG-ja, skuadra e kryeqytetit francez, që do të niste një cikël fitues, me katër tituj të njëpasnjëshëm.
Një cikël që ka ardhur pranë fundit të tij. PSG-ja ka triumfuar në rivalitetin me Monakon në këtë sezon në dy veprimtari të tjera. Në Kupën e Ligës, PSG-ja do të fitonte 4-1 në finalen ndaj Monakos, për ta mundur 5-0 e për ta eliminuar në gjysmëfinalen e Kupës së Francës.
Në kampionat, ama, gjërat janë ndryshe. Monako shpreson të rikthehet te titulli pas 17 vitesh, e ndodhet shumë pranë trofeut. Një sukses që mund të bëhet më i ëmbël me zbritjen e PSG-së nga froni.
Paris Sent-Zhërmeni ka humbur 3-1 mbrëmë në fushën e Nicës. Një takim mjaft i tensionuar, ku nuk kanë munguar dhe dy kartona të kuq për kryeqytetasit, një i nxjerrë për Motta-n e tjetri për Di Maria-n.
Balotelli ka shënuar fillimisht për vendasit, që e kanë gjetur rrjetën dhe me anë të Ricardo Pereira-s dhe Donis-it. Marquinhos do ta ngushtonte përkohësisht rezultatin për miqtë në minutën e 64-t.
Tre pikë pas Monakos kryesuese, PSG-ja ka një ndeshje më shumë të luajtur. Shtatë pikë i mjaftojnë Monakos në katër takimet që e presin për t’u shpallur kampione e Francës. /tesheshi.com/
