Votat e dërguara me postë kanë luajtur një rol kyç në shmangien e zgjedhjes së një presidenti nga e djathta ekstreme e Austrisë.
Alexander Van der Bellen ka fituar ngushtësisht falë këtyre votave, duke u bërë kështu presidenti i ri austriak.
Kundërshtari i tij, ekstremisti i djathtë Norbert Hofer, kandidati i Partisë së Lirisë, kryesonte ngushtësisht pas votimeve të së dielës, por numërimi i votave postare e ka përmbysur situatën.
Kandidati i mbështetur nga të gjelbrit, Van Der Bellen, është shpallur fitues me 50.3% të votave, karshi 49.7% të votave të siguruara nga rivali i tij.
Ministria e Brendshme austriake njoftoi se Van Der Bellen kishte marrë 2.254.484 vota, ndërsa Hofer kishte në favor 2.223.458 vota.
Diferencën e bënë 750.000 votat e dërguara me postë, që e kthyen rezultatin në favor të kandidatit të të gjelbërve.
Nëse Norbert Hofer do të fitonte, ai do të bëhej i pari kryetar shteti në BE që i përkiste së djathtës ekstreme. Ai e përshkroi këtë të hënë si një ditë të trishtueshme. Gjithsesi, ai u ka dhënë kurajë mbështetësve të vet: “Ju lutem, mos jini zemërlëshuar. Përpjekja në këtë fushatë elektorale nuk ka shkuar dëm, por është një investim për të ardhmen.” /tesheshi.com/
