Kandidati LDK-së për Prishtinën, Arban Abrashi, është përpjekur të mbajë lart moralin, të tijin persona dhe të partisë që përfaqson, duke ofruar shpresën se jo gjithçka ka përfunduar.
Ai, edhe pse nuk ka arritur të fitojë, referuar rezultatit preleminar të KQZ-së, ngul këmbë se do të jetë fitues pas numërimit të votave “me kusht” dhe atyre “me postë”.
Ai më tej, ka thënë se ai bashkë me ekipin e tij arriti që për një kohë të shkurtër ta përmbysë epërsinë e rivalëve politikë.
Ndërsa për rivalin e tij, vetëvendosësin Shpend Ahmeti, gjithçka ka përfunduar. Ai është fitues dhe do vijojnë ta drejtojë Prishtinën dhe për katër vite të tjera.
Postimi i plotë i Abrashit:
Jemi në garë. Dhe do të fitojmë.
Do t’i numërojmë të gjitha votat. Jam besimplotë se brenda atyre fletëvotimeve që kanë mbetur pa u numëruar, është fitorja jonë, fitorja e Prishtinës evropiane.
Me qetësi, me durim, me mençuri e me vendosmëri, do ta administrojmë procesin në vazhdim. Për ta çuar në vend vullnetin e qytetarëve të Prishtinës.
Unë besoj në fitore. Ashtu sikurse Ju besoj.
E kam filluar garën kur zgjedhjet ishin caktuar. Deri atëherë, as nuk më shkonte ndërmend se do të isha kandidati i Lidhjes Demokratike të Kosovës, forcës kryesore politike në Kosovë, për kryetar të Prishtinës.
Brenda pak javësh, me mobilizimin e Lidhjes Demokratike të Kosovës dhe të ekipit tim, arritëm të përmbysnim epërsinë e rivalëve.
Dëshmuam se jemi konkurentë të fortë dhe besoj të pathyeshëm.
Koalicioni ynë me qytetarët e Prishtinës dhe me partnerin e koalicionit tonë, do të ngadhnjejë.
Secila votë do të numërohet. Dhe ne do të këmbëngulim të mos lejojmë asnjë devijim të vullnetit të qytetarëve të Prishtinës.
Në fund, do të fitojmë.
Urime Prishtinë. /tesheshi.com/
