Një grup refugjatësh sirianë kanë reaguar me një gjest human pas uraganit Irma, në atë mënyrë që kanë filluar të përgatisin ushqim për viktimat.
Dy motra siriane, Abeer dhe Nora al-Sheikh Bakri, u larguan nga atdheu në vitin 2012 dhe u vendosën në Xhorxhia katër vjet më vonë.
Pasi dëgjuan për shkatërrimin që la pas “Irma” dhe zhvendosjen e banorëve të atyshëm, ato bënë një udhëtim 1-orësh deri në qendrën islame “Hamzah” në qytetin e Alpharetta, ku janë strehuar 39 persona të shpërngulur.
Ato pastaj përgatitën për ta një gamë ushqimesh tradicionale të Lindjes së Mesme.
“Thirra motrën time Norën dhe filluam të gatuajmë”, thotë Abeer, 28 vjeçe. “Ne e dimë ndjenjën kur lë gjithçka prapa”.
Motra e saj, Nora, 30 vjeçe, tha se nuk donin që të tjerët të ndiheshin ashtu siç ishin ndjerë ato.
“Kisha kaq frikë kur dëgjuam për stuhinë. Veçanërisht ne sirianët. Ne jemi tashmë të traumatizuar”, tha ajo. “Doja të jem në dispozicion që t’i ndihmoj këta njerëz, në mënyrë që të ndihen të lumtur, pra që ata të mos ndihen të deportuar sikur jemi ndjerë ne”.
Nazer Gazel, një refugjat 53-vjeçar sirian që jetonte gjithashtu në Xhorxhia, kishte të njëjtën ide, prandaj dërgoi ushqime të gatuara nga shtëpia në një xhami, ku kërkuan strehim rreth 25 të evakuuar.
“Ne ishim detyruar të vinim në SHBA për shkak të luftës, por tani jemi këtu dhe po na pëlqen ky vend,” tha Gazel, një kuzhinier dhe artist i ushqimit. “Është radha jonë tani që të ndihmojmë këtu. Ne jemi mësuar me luftëra, por jo me uragane. Nuk kemi frikë, të jem i sinqertë. Kemi kaluar nëpër luftë”.
Uragani Irma, i cili është kategorizuar si një nga stuhitë më të fuqishme të Atlantikut, ka vrarë më shumë se 60 njerëz deri tani. /tesheshi.com/
