Nga Shkëlzen Rrecaj
Ka shumë arsye që njerëzit e vendosin shëndetin “në rradhë të parë”; pra e çmojnë atë si gjë të vyer, kur kanë e një pasuri të humbur, kur iu cënohet. Pos kësaj, tek shëndeti rëndon fort dhe xhepi, ekonomia. Kur ti nis të kesh probleme, nuk di nëse hallin më të madh ke më pas shëndetin apo xhepin. Dhe në Kosovë është një poliklinikë që i ka menduar të dyja, me një humanitet për t’u patur zili, edhe nga ata që e shohin të ndjerën e të nderuarën Nënë Terezë si majën e humanizmit, çka do mund ta xhelozonte dhe këtë të fundit, nëse do ishte ende në jetë.
“Human Care” është ajo që qëndron me aktivitetin e saj mes shërbimit mjekësor dhe atë bamirës, mes një poliklinike klasike dhe një organizate bamirëse, si një kombinim perfekt, duke jua bërë qindra kosovarëve më të lehtë sfidat me shëndetin, në çastin kur ato u shfaqen.
Ndodh kjo prej 15 vitesh, që kur “Human Care” nuk u fut në tregun e shërbimit shëndetësor privat, jo “për të prerë pare më gërshërë” por t’i shëruar njerëzit, në kuptimin fizik e në atë shpirtëror. Kur drejtohesh për aty, nuk ka pse të kap marazi nëse ke apo parë në xhep për të paguar, për ta blerë shëndetin që të ka humbur. E shpalos më së miri këtë vizion human drejtori Agim Qehaja.
“’Human Care’ është organizatë bamirëse e cila projekt kryesor e ka poliklinikën specialistike e cila gjatë 15 viteve është në shërbim të qytetarëve të Kosovës, të cilët përfitojnë shumë shërbime mjekësore falas dhe me pagesa simbolike. Qëllimi i është që të gjithë qytetarëve t’u mundësohet shërimi dhe një mirëqenie sa më mirë”, thotë Qehaja, duke evidentuar dhe shërbime të cilat janë: ai i mjekësisë interne dhe kardiologjike, gjinekologjia, pediatria, kirurgjia, stomatologjia, laboratori për analiza dhe rëntgeni.
Por sipas tij, aktiviteti zgjerohet dhe më tej kur kalohet në planin ekstrahumanitar.
“’Human Care’ ndërmerr dhe aktivitete humanitare si grumbullimi dhe shpërndarja e ndihmave të ndryshme për njerëzit në nevojë, ku përveç sigurimit të kujdesit humanitar mjekësor organizon dhe zbaton projekte që kanë për qëllim në ngritjen e nivelit të edukimit shëndetësor për qytetarët, në veçanti për të rinjtë; e po ashtu ngritje e nivelit të profesionalizmit në fushën e shëndetit nëpërmjet trajnimeve falas për mjekët dhe infermierët”.
Kjo ka bërë që “Human Care” të gëzojë reputacion tek njerëzit, akoma më shumë tek nevojtarët, të cilët kanë gjetur aty “derën e duhur” për të trokitur kur gjenden në ditë dhe në pikë të hallit.
“Kjo poliklinikë është bërë dera e vetme për qytetarë të shumtë jo vetëm nga Prishtina por nga e tërë Kosova të cilët trokasin për kërkimin e ndihmës për problemet e tyre shëndetësore. Në baza ditore përfitojnë shërbime shumë pacientë dhe numri i tyre çdo herë është në rritje, pasi në këtë poliklinikë përveç kostos simbolike të pagesës pacientët gjejnë shërbime specialistike me kualitet të lartë dhe ngrohtësinë e pritjes nga stafi”, thekson drejtori Qehaja.
“Human Care gëzon marrëdhënie konstruktive me të gjitha institucionet shëndetësore në Kosovë dhe gjithnjë kërkon partnerë dhe bashkëpunim të mirë me organizatat relevante për të arritur rezultate më të mira dhe për të përmbushur nevojat e të gjithë atyre që kërkojnë ndihmë prej nesh”, shprehet më tej drejtuesi kryesor i saj, duke shtuar se deri me tani kanë përfituar shërbime mjekësore aty mbi 500 mijë pacientë.
E gjithë kjo ndodh tek “Kodra e Trimave” në Prishtinë, aty ku ndodhet “Human Care”, një oaz bamirësie e humaniteti për t’u marrë shembull, një provë e gjallë dhe e prekshme se njerëzorja ka forcë të ngadhnjejë në terrenin e trishtë të gjërave ku duket se ajo është fashitur, ka humbur, është në zhdukje. “Human Care” është përgënjeshtrimi më adeukat i këtij fakti. /tesheshi.com
