Që nga viti 2011, qytetarëve të Kosovës u premtohet heqja e vizave nga politikanët, por edhe pas shtatë vitesh ata vazhdojnë të jenë të izoluar dhe të presin për orë të tëra para ambasadave të ndryshme për të pajisur me vizë.
Izolimi për ta do të vazhdojë gjersa institucionet të marrin notë kaluese nga ndërkombëtarët në luftën anti-korrupsion e krim, çka deri më tani nuk ka shenja pozitive, pasi ende asnjë i ashtuquajtur “peshk i madh” nuk është vënë prapa hekurave.
Ndërsa data e lëvizjes së lirë nuk dihet, në opinion sidomos nga analistët politikë shtrohet shpesh mundësia e ikjes masive të qytetarëve drejt vendeve të BE-së në momentin që hiqen vizat, gjithmonë duke kujtuar ikjet masive ilegale që ndodhën në fund të 2014-të dhe fillim të 2015-tës, ku qytetarët shitën edhe pronat për një jetë më të mirë në Gjermani, Francë apo ndonjë shtet tjetër, por që shumica u kthyen mbrapsht pasi nuk ju pranua azili.
Lidhur me këtë çështje, Instituti Demokraci për Zhvillim (D4D), ka realizuar një hulumtim gjatë muajit mars 2018, që tregon se arsyet e shfrytëzimit të liberalizimit të vizave nga qytetarët nuk përkojnë me çfarë në fakt shërben liberalizimi.
Ky institut sqaron se liberalizimi i vizave qytetarëve të Kosovës u mundëson udhëtim pa vizë vetëm deri në 90 ditë, çdo gjashtë muaj, në zonat Schengen, por nuk mundësohet e drejta për punësim ose për jetesë në zonat Schengen, por as të drejtën për shkollime/trajnime që zgjasin mbi 90 ditë në ato zona, pa pasur leje qëndrimi nga autoritetet përkatëse.
Ky hulumtim tregon që rreth 23.8% e qytetarëve pohojnë që do të shfrytëzonin liberalizimin për mundësi të punësimit, 11.8% për edukim më të mirë dhe rreth 5.9% tjerë për largim nga vendi. Shumica e madhe (36.1%) do t’a shfrytëzonin liberalizimin e vizave për vizitë familjare, ndërsa 21.8% për turizëm.
D4D thotë se informatat rreth liberalizimit të vizave dhe përfitimeve nga kjo duhet të jenë jo vetëm në dispozicion por të paraqiten në mënyra të qasshme dhe të kuptueshme për qytetarët.
Kujtojmë se ndërsa ndërkombëtarët nuk japin afate kohore për heqjen e vizave, së fundmi kryeministri Ramush Haradinaj deklaroi se në qershor Kosova pritet ta marrë rekomandimin për heqjen e vizave, kurse në fund të vitit shprehu besimin se kosovarët do udhëtojnë lirshëm.
B.Gashi – /tesheshi.com/
