Një hulumtim i bërë së fundmi nga Instituti Demokratik i Kosovës (KDI) në mesin e votuesve të rinj nga mosha 17 deri 21 vjeçare, tregon se ish kreu i Vetëvendosjes-s Albin Kurti me (13.7 %) është politikani që ata kanë model, duke lënë prapa presidentin Hashim Thaçi (10.05%)e kryekuvendarin Kadri Veseli (7.05%).
I katërti renditet Ramush Haradinaj me (5.4%), kurse pesëshen e përmbyll Vjosa Osmani me (4.7 %).
Vlen të ceket se kryeministri aktual Isa Mustafa renditet pas Behgjet Pacollit (4.7 %) dhe Shpend Ahmetit (4.6%), pasi për të kanë votuar vetëm (3.8%), aq sa edhe Mimoza Kusari-Lila, aktualisht kryetare e Gjakovës.
Ndërsa, 23.5 për qind kur janë pyetur se ‘cili nga figurat politike në Kosovë është model për ju”,kanë thënë se asnjë.
13.3 për qind të të intervistuarve kanë thënë se kanë dike tjetër të preferuar. Ndërsa 4.1 për qind kanë thënë që nuk e dinë, e 1.7 për qind kanë refuzuar.
Hulumtimi është zhvilluar nga data 26 nëntor deri më 9 dhjetor, si dhe ka përfshirë 1,200 respodentë, prej tyre 50.3% vajza dhe 49.7% djem. Për të përfaqësuar shpërndarjen e popullatës në bazë të etnisë dhe vendbanimit, 71.9% e të anketuarave janë shqiptarë, 16.7% serbë dhe 11.4% të tjerë, ndërsa 52.7% në zonat rurale dhe 47.3% në zonat urbane. Marzha e gabimit është +- 2.74%.
Sa i përket qëndrimeve të të rinjve për partitë politike, mbizotëron mendimi se ato janë të ndikuara nga një grup i vogël njerëzish me fuqi të madhe.
Si një e gjetur më shqetësues nga anketimi ka dalë që të rinjtë i shohin partitë politike si institucione nga të cilat mund të përfitojnë punësim dhe avancim më të lehtë në karrierë. Si institucioni më i besuar në mesin e të rinjve është renditur komuna, ndërsa në partitë politike kanë më së paku besim. /tesheshi.com/
