Pavarësisht se disa ish-zyrtarë të lartë të Vetëvendosjes pas përçarjes që plasën në këtë parti kritikuan Albin Kurtin për “kapje” të partisë, ku më pas 12 deputet të pakënaqur formuan grup të ri parlamentar, kryevetëvendosësi Kurti vazhdon të mbetet politikani më model nga të rinjtë kosovarë, duke lënë pas gjithë krerët e shtetit dhe partive politike.
Kurti shihet si model nga 13.7 për qind e të rinjve. Pas tij, si politikani më popullor është Ramush Haradinaj me 7.8 për qind, Vjosa Osmani me 7.4 për qind, Shpend Ahmeti me 7.3 për qind, Hashim Thaçi me 7 për qind dhe Kadri Veseli me 5.8 për qind. Kështu tregon një hulumtim i realizuar nga Instituti Demokratik i Kosovës (KDI), lidhur me qëndrimet dhe preferencat politike të të rinjve.
Edhe bazuar në ndarjen etnike të të anketuarve, politikani model shqiptar është Kurti me 14.4 për qind, ndërsa tek të rinjtë serb Slavko Simiq me 10 për qind.
Megjithatë hulumtimi tregon se përqindja e të rinjve të cilët nuk e shohin asnjë politikan aktual si model që duhet ndjekur, është më e lartë se përqindja e politikanit që shihet si model. Rezultatet tregojnë se 25.2 për qind e të rinjve nuk kanë asnjë politikan model. Përqindje më e theksuar e të rinjve që nuk kanë asnjë politikan model vërehet rek të rinjtë e komunitetit serb, me 81 për qind. Kurse pjesa tjetër e të rinjve kanë dhënë mbi 50 emra të politikanëve që kanë model. /tesheshi.com/
