Qeveria amerikane ka shpenzuar gjithë këto vite me miliona dollarë në hulumtimin e sëmundjeve vdekjeprurëse të lidhura ngjarjet tragjike të 11 shtatorit 2001 në Qendrën Botërore të Tregtisë. Por ajo kurrë nuk ka paralajmëruar zyrtarisht njerëzit të cilët kanë jetuar dhe punuar në Manhatanin e Poshtëm gjatë 11 shtatorit, se sulmet e kanë shndërruar zonën në një terren të përshtatshëm për sëmundje kancerogjene.
Në një konferencë për shtyp në Akademinë Mjekësore të Nju Jorkut të mërkurën, hulumtuesit kanë ofruar dëshmi të freskëta për shkallën e rritur të sëmundjeve kancerogjene, të zemrës dhe ato respiratore, si dhe çrregullime të stresit post-traumatik të lidhura me Nivelin Zero. Një prej mjekëve madje deklaroi se pasojat e rrezikshme shëndetësore të sulmeve janë të të njëjtit nivel me ato të aksidenteve bërthamore në Çernobil në Ukrainë në vitin 1986 dhe në Fukushima të Japonisë në vitin 2011.
Duke i bërë një hyrje dokumentit, i cili pritet të publikohet së shpejti, Dr. Roberto Luçhini nga Programi Shëndetësor i Qendrës Botërore të Tregtisë në Mount Sinai të Nju Jorkut, u tha të pranishmëve se ndërsa sulmet e 11 shtatorit kanë rezultuar me rritjen e rasteve të kancerit për ata që jetojnë dhe punojnë pranë Nivelit Zero, në Fukoshima akoma nuk janë shfaqur raste të ngjashme deri më tani.
“Ne po përpiqemi për të parë se çfarë ka ndodhur në secilën prej këtyre situatave dhe çfarë ka ndodhur më pas, në mënyrë që të nxjerrim mësime të cilat do të na çojnë në një përgjigje më të mirë ndaj katastrofave mjedisore në të ardhmen”, u tha ai mjekëve, psikologëve dhe të mbijetuarve gjatë një konference njëditore. “Çernobili po ashtu çoi deri në sëmundje kancerogjene të popullatës përreth”, vuri në dukje ai. Për shkak se periudha e inkubacionit mund të marrë vite, mjekët thonë se është e mundur që në Fukushima të mund të ketë rritje të rasteve të sëmundjeve kancerogjene pas një kohe.
Ajo çfarë e bën 9/11 më ndryshe, tha Luçhini, është fakti se katastrofa mjedisore u shkaktua nga sulmet terroriste.
Sulmet e 9/11 kanë ndikuar në një numër të madh njerëzish, ku 400,000 vetë janë të rrezikuar nga kanceri, sipas programit shëndetësor të Qendrës Tregtare Botërore.
Raporti i Luçhinit është një prej shumë raporteve të cilat kanë lidhur Nivelin Zero me numër të paparë të sëmundjeve, të kombinimit të tyre, kancerit dhe çrregullimeve të shëndetit mendor.
“Studimi i efekteve të menjëhershme shëndetësore të resë toksike menjëherë pas 9/11 më ka marrë shumë muaj”, thotë Dr. Joan Reibman, nga Fakulteti i Mjekësisë në Universitetin e Nju Jorkut. Pas vizitës derë më derë, shtëpi më shtëpi, ai dhe ekipi i tij kanë gjetur se shumë prej të mbijetuarve të 9/11 vazhdojnë të vuajnë simptoma serioze respiratore edhe 15 vite pas sulmeve.
Mjekët të cilët ishin në këtë konferencë, thanë për Newsweek se studimi i efektit të 9/11 mund të çojë deri te kërkime novatore, veçanërisht në lidhje me kancerin dhe sëmundjet e stresit post-traumatik.
Koncensusi ishte më pak i qartë në lidhje me atë se kur do të jetë i sigurtë përsëri Manhatani i Poshtëm. Derisa kërkimet në konferencë kanë treguar se shumë të ekspozuar ndaj pluhurit toksik me 9/11 apo menjëherë pas sulmit, kanë dalë të jenë më të prekururit nga sëmundjet; disa mjekë kanë thënë se ata kanë takuar edhe pacientë të rinj, të cilët kanë ardhur për vizitë mjekësore për shkak të sëmundjeve që janë paraqitur nga të ekspozuarit e vazhdueshëm. Këta mjekë kanë kërkuar të mos identifikohen me emra, për shkak të implikimeve politike. /tesheshi.com/
