Këngëtari nga Kosova, Shkodran Tolaj, eshtë sulmuar fizikisht të enjten në Kërçovë nga huliganët maqedonas, të cilët e kanë goditur me mjete të forta. Në momentin e sulmit ai po realizonte një videoklip për mërgimtarët kërçovarë.
Si pasojë e sulmit, këngëtari Tolaj ka marrë lëndime në trup, ndërsa ka pasur edhe gjakderdhje në kokë, konkretisht afër syrit të majtë dhe për pasojë i është nënshtruar trajtimit mjekësor.
Akti i dhunës ndaj këngëtarit Shkodran Tolaj ka ngjallur zemrim dhe reagime të ashpra të shqiptarëve të Maqedonisë.
“Sulmi kriminal ndaj mjeshtrit të madh të këngës shqipe, Shkodran Tolajt, është i dënueshëm dhe i papranueshëm” thuhet në reagimin e Komunës së Kërçovës, duke shtuar se “ai asnjëherë nuk është kursyer për Uskanën andaj edhe për të Ai ka qenë, është dhe do të mbetet biri i saj”.
Lajmi për sulm fizik ndaj tij është bërë publik edhe nga vetë këngëtari Tolaj në faqen e tij në “Facebook”.
“Pavarësisht sulmit brutal dhe lëndimeve që kam marrë, ju informoj se jam më mirë, falë përkujdesjes maksimale dhe ekipit të mrekullueshëm të mjekëve në spitalin e Kërçovës. Njëkohësisht, ju falënderoj të gjithëve nga zemra për përkrahjen morale dhe dua të ju informoj se puna dhe misioni ynë do realizohet deri në fund. i lutem të gjithë mërgimtarëve kërçovarë që të na bashkohen në Uskanë me 15 tetor për të festuar fitoren e madhe se vetëm atëherë do t’i harroj plagët që i mora sot”, ka shkruar Tolaj. /tesheshi.com/
