Gjigandi kinez i teknologjisë Huawei paraqiti një ankesë në një gjykatë amerikane në Teksas, duke sfiduar kushtetutshmërinë e një ligji që kufizon shitjen e pajisjeve të saj. Kjo ankesë vjen si kundërveprim ndaj mosmarrëveshjeve të vazhdueshme me qeverinë e SHBA-ve.
Zyrtari kryesor ligjor i Huawei, Song Liuping, tha në një konferencë për shtyp se Huawei kishte paraqitur një kërkesë për rishikim gjykimi, duke i kërkuar gjykatës të vendosë nëse është kushtetuese apo jo që SHBA-të të zbatojnë një dispozitë të tillë që bllokon qeverinë dhe kontraktorët e saj nga përdorimi i pajisjeve Huawei .
Song tha se “fushata e sanksionuar nga shteti” kundër kompanisë nuk do të përmirësojë sigurinë kibernetike.
“Politikanët në SHBA po përdorin forcën e një kombi të tërë për të ardhur pas një kompanie private”, tha ai. “Kjo nuk është normale,” deklaroi ai.
Dy nga ekonomitë më të mëdha në botë – SHBA dhe Kina – janë duke hedhur shkëndijat e luftës tregtare dhe potencialisht katastrofike.
Huawei është prodhuesi më i madh global i pajisjeve të rrjetit, por tani po lufton për të ruajtur qasjen në tregjet kryesore për komunikim, pasi SHBA pretendon se kompania kërcënon sigurinë ndërkombëtare të kibernetikës. /tesheshi.com/
