Brajan Hoyt Yee, diplomati i lartë amerikan që mban postin e Zëvëndësndihmës sekretarit të shtetit për EuroAzinë, nisi paraditen e kësaj të hëne misionin e tij të vështirë për të zgjidhur ngërçin e politikës shqiptare, shkaktuar nga çadra e opozitës me kërkesën e saj për largimin e Ramës dhe qeveri teknike, shtuar këtyre dhe bojkotin e zgjedhjeve.
Ndërhyrja e tij në gjetjen e një kompromisi, konsiderohet si e fundit shpresë por dhe me shpresëdhënësja, për të bërë të mundur mbylljen e çadrës dhe shkuarjen e PD-së në zgjedhje, e cila për më tepër ka shpallur bojkotin e 18 qershorit.
Takimet e Hoyt Yee-së nisën me Ramën, për të pasuar me Metën e Bashën, e më në fund me një grup oponent brenda PD-së, të përbërë nga Jozefina Topalli, Majlinda Bregu dhe Astrit Patozi. Kjo është dhe risia e kësaj vizite, pasi mesazhi i Uashigtonit është që njeh dhe vlerëson këtë fraksion brenda partisë më të madhe e opozitare, gjë jo e lehtë për lidershipin e PD-së që nuk pranon asnjë tërheqje e që vijon të mbajë në ekstrem ultimatumet e saj.
Gjithashtu pritet – gjithnjë nëse nuk do arrihet kompromisi – që dhe Uashingtoni, ashtu siç Bruskeli me gjuhën e eurokomisionerit Hahn, të mbështesë zgjedhjet pa PD-në e të njoh rezultatin e tyre. Këtë sinjal e ka dhënë ditë më parë edhe ambasada amerikane në Tiranë. /tesheshi.com/
