Zyrtari i lartë i Departamentit amerikan i Shtetit, Hoyt Brian Yee i ka dhënë Lulzim Bashës vetëm një alternativë: të pranojë paketën Mcallister, përndryshe do të ketë zgjedhje edhe pa PD-në. Madje ndërkombëtarët do t’i njohin ato.
Pak para takimit me kreun demokrat, Yee theksoi se bojkoti nuk është i pranueshëm.
“Paketa Mc Allister është e pranueshme dhe ne e mbështesim. Por nuk kërkojmë marrëveshje me ndryshim Kushtetute. Zgjedhjet janë gjithmonë më të mira kur ka përfaqësim të gjerë. Nëse disa parti përjashtojnë veten, dëmtojnë veten, imazhin e vendit dhe investimet e huaja. Eshtë e drejta e partive për të mos marrë pjesë në zgjedhje. Nëse zgjedhjet çertifikohen si të rregullta nga BE, OSBE dhe SHBA, do t’i njohim. Dhuna nuk ka vend në një vend demokratik. Zgjidhja duhet të vijë nga liderët politike. Shpresojmë që do të ketë zgjedhje. Ka një oferte nga McAllister. Eshtë ofertë e mirë. Shpresojmë që partitë ta pranojnë. Duhet dialog mes palëve. Koha po skadon. Jemi optimistë. Nuk besojmë se Rama dëshiron të qeverisë pa opozitën”, tha Yee para gazetarëve.
Ndërkohë, zyrtari i lartë amerikan është sulmuar ashpër nga qarqe pranë PD-së para takimeve që kanë tentuar të ulin rëndësinë e tij, duke thënë se ai do të largohet nga detyra që ka në DASH.
Tashmë, Yee ndodhet në selinë e PD-së për takimet, si me Bashën e si me grupin oponent karshi tij, por që në të nuk do jetë Patozi. Ky i fundit tha se kishte arsye personale që do mungonte në takimin me diplomatin amerikan. /tesheshi.com/
