I intervistuar nga REL, kandidati i PDK-së për kryeministër të Kosovës, Enver Hoxhaj, njëherësh ish-ministër i Jashtëm, tha se realitetet ndërkombëtare rreth Kosovës janë bërë më të komplikuara sot, e sipas tij duhet shfrytëzuar sa mundet Biden dhe Merkel.
“Kosova duhet ta shfrytëzojë në mënyrë historike një shans, i cili është në vitin 2021 me Joe Bidenin president dhe sa gjatë është zonja Merkel kancelare që ta përmbyllë dialogun Kosovë-Serbi, me njohje të ndërsjellë.
Miqtë e Kosovës po plaken, gjeneratat e reja po vijnë në politikë, vëmendja ndaj Kosovës po humbet dhe kjo është arsyeja pse vendi ka humbur shumë kohë me këto qeveritë e fundit, edhe me qeverinë e zotit Haradinaj, qeverinë e zotit Kurti, edhe me qeverinë e zotit Hoti.
Disa prej tyre kanë qenë kundër Uashingtonit, disa prej tyre kanë qenë kundër Brukselit, Parisit dhe Berlinit. Dhe këto janë pasoja që ne i kemi në shkurtin e 2021-s. Dhe qytetarët e Kosovës e dinë. E matshme është për shembull çështja e liberalizimit të vizave. Po të merrej vendimi më 2016, sot do të lëviznin njerëzit pa viza. Në atë kohë e kanë pasur një kauzë të rrejshme, këta të gjithë që sot janë rivalë të PDK-së, Albin Kurti, Vjosa Osmani…”, theksoi Hoxhaj.
Ndërsa për rastin më të fundit, atë të lidhjes së marrëdhënieve me Izraelin, Hoxhaj tha se kjo është diçka positive për Kosovën.
“Unë mendoj se njohja e ndërsjellë ndërmjet Kosovës dhe Izraelit është një lajm i mirë. Unë kam qenë ministër i Jashtëm gjatë i Kosovës, dhe natyrisht kam punuar që edhe Izraeli ta njohë Kosovën dhe vendosja e marrëdhënieve diplomatike ndërmjet Izraelit dhe Kosovës është një lajm i mirë, të cilin e kemi përshëndetur dhe vetëm kur janë vendosur marrëdhëniet diplomatike, Izraeli e ka njohur Kosovën, çfarë unë kam insistuar gjatë, se do të thotë ka pasur përpjekje vetëm atë deklaratën ta interpretojnë si njohje, ndërsa se si e ka menaxhuar qeveria e Kosovës dhe se si po bën përpjekje ta menaxhojë Lëvizja Vetëvendosje, është totalisht e gabuar”, theksoi Hoxhaj për REL. /tesheshi.com/
