Kreu i diplomacisë kosovare, Enver Hoxhaj, u ka përcjellë një letër 49 ministrave të Jashtëm, kryesisht të vendeve të Perëndimit, e patjetër të BE-së, me anë të së cilës detajon rastin e trenit serb nisur nga Beogradi për në Mitrovicë, duke e quajtur atë si një përpjekje provoktive.
Në atë çfarë shkruan Hoxhaj, thotë se ky rast nuk është i izoluar, por pjesë e një qasjeje sistematike armiqësore e Serbisë ndaj Kosovës, në të cilën përmenden deklaratat, ndërtimi i murit, tërheqja e ministrave serbë dhe e deputetëve nga institucionet e Kosovës, arrestimi i Haradinajt dhe i kryepolicit Nehat Thaçi, etj.
“Ka pretendime të Serbisë për ta realizuar vetveten jashtë kufijve të saj dhe që rrezikon stabilitetin jo vetëm të Kosovës, por edhe të rajonit”, shkruan në letër Hoxhaj në letrën e tij për 49 homologë, duke lënë të nënkuptuar se aksione të ngjashme Beogradi po ndërmerr dhe në Bosnje, me anë të liderit të Republika Srpska, Milorad Dodik.
“Kosova është detyruar të mbrojë sovranitetin e saj duke mos lejuar të hyjë dhe që të mbrojë kufijtë shtetërorë”, shkruan Hoxhaj, duke kërkuar nga vendet e tyre respektive që të jenë më të vëmendshme ndaj veprimeve të Serbisë. /tesheshi.com/
