Ministrja e Drejtësisë së Kosovës, Dhurata Hoxha, gjatë debatit në tryezën e rrumbullakët në të cilën është prezantuar raporti vjetor i Fondit për të Drejtën humanitare, me titull: “Koha kalon, drejtësia për krimet e luftës zbehet”, të mbështetur nga Ambasada e Britanisë së Madhe, ku mori pjesmori pjesë edhe ambasadori Ruairi O’Connell, ka kërkuar që fajtorët për krime të luftës të sillen para drejtësisë.
Ministrja Hoxha tha se është e dhimbshme për të gjithë që edhe pas 18 vitesh nga mbarimi i luftës, nënave, baballarëve, motrave, vëllezërve, bashkëshortëve e fëmijëve u mungon e vërteta., andaj shtoi se atyre duhet t’i ipet përgjigje në pyetjet që sjellin të vërtetën.
“E vërteta është më e pakta që duhet ta kenë në këtë dhimbje: çka dhe pse ndodhi? Si humbën ata që humbën? Ku mbetën familjarët e tyre? Si do t’ia bëjnë për të ecur përpara? A do të ndëshkohet dikush që vrau pamëshirshëm familjarin e tyre vetëm sepse fliste gjuhën tjetër, i përkiste kombit tjetër?”, theksoi Hoxha.
Nuk thuhet kot se drejtësia e vonuar është drejtësi e mohuar, shtoi ministrja, andaj tha se duhet punuar së bashku që të mos iu mohohet drejtësia viktimave të këtyre krimeve dhe ftoi institucionet e gjyqësisë të kryejnë punën e vet me prioritet të veçantë për dënimin e autorëve të krimeve të luftës të kryera në Kosovë.
Kurse ambasadori britanik Ruari O’Connell ofroi mbështetjen e mëtejme për këtë çështje të ndjeshme.
Ai vuri në pah gatishmërinë e përkrahjes për shkak të mungesës së përvojës së gjyqësisë së Kosovës lidhur me këtë fushë duke theksuar angazhimin e vazhdueshëm që duhet të bëhet nga institucionet vendore në këtë drejtim. /tesheshi.com/
