Kryeministri i Kosovës Avdullah Hoti shpalosi të mërkurën në Akademinë e Shkencave dhe të Arteve të Kosovës, kornizën e qeverisë s për dialogun me Serbinë. Ai ka thënë se dialogu do të zhvillohet në bazë të Kushtetutës së Kosovës, e do ketë si synim final njohjen reciproke.
“Nuk ka kuptim asnjë marrëveshje pa njohje reciproke, dhe jo njohje reciproke të përkohshme, por njohje reciproke që na siguron ulëse në OKB dhe na siguron njohjen nga pesë vendet e BE-së që ende nuk na kanë njohur”, deklaroi Hoti.
Dialogu me Serbinë, ka shtuar Hoti, do të udhëhiqet nga kryeministri i vendit.
“Dialogun e udhëheq kryeministri i Kosovës. Ka pasur diskutime nga më të ndryshmet, javët dhe muajt e fundit, unë nuk do të bëj kurrfarë gare me bartësit tjerë institucionalë, pasi që kompetencat e mia kushtetuese janë të qarta, përfshirë edhe kompetencat për dialog”, ka deklaruar Hoti.
Sa u përket parimeve të dialogut, Hoti tha se integriteti territorial i Kosovës është i panegociushëm.
Tri parime kryesore që duhet t’u përmbahemi janë:
Integriteti territorial është i panegociueshëm. Nuk dua dhe nuk kam mandat të diskutoj për integritetin territorial; Marrëveshja që duhet të arrihet për njohje reciproke duhet të sigurojë që konflikti të zhduket;
Organizimi kushtetues është i panegociueshëm. Marrëveshja që duhet të arrihet duhet të jetë në frymën kushtetuese.
Objektivi i qeverisë së Kosovës në dialogun me Serbinë, ka njoftuar Hoti është që në këtë marrëveshje të adresohen të gjitha çështjet e hapura me Serbinë, siç është fati i të pagjeturve dhe një listë e gjatë e çështjeve që janë në pritje.
Në anën tjetër, Akademia e Shkencave dhe e Arteve e Kosovës (ASHAK) ka thënë se Kosova duhet t’i qaset seriozisht procesit të dialogut për normalizim të raporteve me Serbinë.
Kjo Akademi ka kërkuar që të ruhet integriteti territorial i Kosovës, në bazë të kufijve të njohur ndërkombëtarisht, sipas Deklaratës së Pavarësisë 2008.
Kujtojmë se dialogu mes Kosovës dhe Serbisë është pezulluar nga nëntori i vitit 2018, kur autoritetet e Kosovës patën vendosur taksë 100 për qind në mallrat e Serbisë dhe Bosnje-Hercegovinës.
Ndërkohë kjo masë është zëvendësuar me reciprocitet, mirëpo qeveria e re e kryeministrit të Kosovës, Avdullah Hoti ka hequr të gjitha masat, për shkak të siç është shprehur ai, heqjes së të gjitha pengesave për vazhdimin e dialogut me Serbinë.
Dialogu mes Kosovës dhe Serbisë, i ndërmjetësuar nga Bashkimi Evropian, ka nisur më 2011 në Bruksel. /REL/
