Kryeministri në detyrë i Kosovës, Avdullah Hoti, ka paralajmëruar se procesi i dialogut me Serbinë duhet të përfundojë me një marrëveshje përfundimtare për njohje reciproke. Në të kundërtën tha ai, Kosova do t’i zbatojë të gjitha masat e reciprocitetit me Serbinë.
“Të gjitha pa përjashtim, të gjitha masat që Serbia i drejton nga ne, ne kemi të drejtë dhe do t’i drejtojmë kah Serbia”, ka thënë Hoti pas një takimi me përfaqësues të shqiptarëve të Luginës së Preshevës.
Megjithatë, Hoti tha se beson që me përfshirjen e “partnerëve ndërkombëtarë që kemi arritur në këtë proces” nuk do të ketë nevojë të që aplikohen këto masa ekstreme, pasi sipas tij, çdo ditë po bëhet progres drejt marrëveshjes përfundimtare me Serbinë.
Kujtojmë se me ardhjen në qeverisje, Hoti shfuqizoi reciprocitetin, duke mundësuar rifillimin e dialogut në korrik të 2020-ës.
Ka disa muaj që Hoti dhe presidenti Vuçiç nuk kanë zhvilluar raunde të reja të bisedimeve. Nga BE-ja është thënë se takimet në nivel politik nuk po mbahen për shkak të situatës pandemike.
Ky qëndrimi i fundit i Hotit, është parë dhe si hyrje e tij në fushatën e zgjedhjeve të 14 shkurtit.
Ndryshe, Hoti është kandidat i LDK-së për kryeministër. /tesheshi.com/
