Pas kthimit nga një vizitë në Bruksel, kryeministri Hoti i është shmangur komenteve mbi një dualitet rivalizues SHBA-BE mbi çështjen e Kosovës. Sipas tij, edhe takimi i Uashingtonit do të mbahet, por dhe ai i Parisit.
“E kemi shtyrë vizitën në Uashington, pas diskutimeve me Grenellin jemi dakorduar për një datë tjetër së shpejti. Agjenda mbetet e njëjtë që t’i jepet shtysë dialogut përmes një agjende ekonomike. Tani janë duke u bërë angazhimet për samitin e Parisit. Jemi të nderuar që kemi një fokus kaq të madh të presidentit francez dhe kancelares gjermane”, deklaroi kryeminsitri kosovar.
Në gjykimin e tij, është pozitiv fakti se dy polet e Perëndimit kanë një fokus maksimal ndaj Kosovës.
“Ne mbesim të përkushtuar për dialogun. Besojmë thellë që dialogu nuk ka alternativë. Këtë qëndrim e kam prezantuar edhe në BE. Është me interes për Kosovën që ky proces të mbyllet sa më shpejtë, duke qenë se ka interesim të madh nga BE dhe SHBA. Për shkak të zhvillimeve të ditëve të fundit, ne kemi shtyrë vizitën në Uashington”, tha Hoti në një konferencë për media. /tesheshi.com/
