Kryetari i AKR-së, Behgjet Pacolli ndonëse nuk ka përmendur emra të rivalëve edhe sot ka goditur ata duke thënë se më 11 qershor koalicioni i tyre do të festojë fitoren e madhe dhe do të ndahet nga njerëzit e këqij, nga njerëzit që e kanë rrënuar Kosovën.
Ai tha se me qeverisjen e AKR-së dhe aletatëve të saj do të fillojë epoka e qeverisjen nga njerëzit që e duan vendin, e duan zhvillimin, që e respektojnë gjakun e dëshmorëve.
“Kjo ndarje do të ndodhë më 11 qershor dhe në këtë rrugë ndihmë të madhe presim edhe nga kjo anë. Prandaj, më 11 qershor dilni dhe votoni për familjen e madhe të Ibrahim Rugovës”, ka thënë Pacolli, sot në tubimin e mbajtur në Novobërdë.
Kurse kandidati për kryeministër Avdullah Hoti premtoi qeverisje me duar të pastra.
“Në qeverinë që unë do ta drejtoj nuk do të ketë njerëz që kanë probleme me personalitetin e tyre, ose që kanë probleme me ligjin. U garantoj se do ta themelojmë qeverinë më profesionale që ka pasur ndonjëherë Kosova, qeveri me duar të pastra dhe zhvillim ekonomik dyfish më të madh, sepse askush më mirë se ne nuk di ta bëjë këtë punë”, ka thënë Hoti. /tesheshi.com/
