Gati 30 milionë turistë kanë vizituar Tajlandën gjatë vitit të kaluar, por vetëm 658,000 kanë qenë nga Lindja e Mesme, sipas të dhënave nga Departamenti i Turizmit të Tajlandës.
Hoteli me katër yje, Al Meroz në Bangkok i cili u hap në nëntor, shpreson të luajë një rol të rëndësishëm në ndryshimin e këtyre statistikave.
“Janë 1.6 milionë muslimanë në botë. Po flasim për një treg të madh”, thotë menaxheri i përgjithshëm i hotelit, Sanya Saengboon.
“Na mjafton vetëm 1% i këtij tregu, që të lulëzojë ky biznes”.
Al Meroz, i cili krenohet me arkitekturën e hotelit në formë të xhamisë, ka dy salla për faljen e namazit dhe tri salla të mëdha për ngrënie hallall.
Dhomat kushtojnë prej 4,000 baht deri në 50,000 baht ($116 deri $1,445) për natë, thotë Sanya.
Aamir Fazal, 28-vjeçar nga Australia, është një prej musafirëve që është vendosur në këtë hotel. Ai thotë se qasja në një hotel hallall si ky, është një lehtësim i madh për turistët muslimanë që vijnë në Tajlandë, ku ushqimi hallall është vështirë të gjendet.
“Është një përvojë me të vërtetë e bukur. Ky është hoteli i parë hallall këtu dhe është vërtetë e mahnitshme”, thotë Fazal.
Të etur për të trokitur në tregun musliman të turizmit, Tajlanda ka lëshuar për përdorim një aplikacion për celularë vitin e kaluar, i cili u ndihmon turistëve që të bëjnë kërkime për restorane hallall dhe atraksione tjera të përshtatshme për muslimanë.
Pjesë të Tajlandës jugore, afër kufirit me Malajzinë, janë me shumicë muslimane.
Shumë malajzianë shkojnë përtej kufirit për vizita të shkurta atje, por niveli i ulët i kryengritjes separatiste në jug ku kanë ndodhur disa sulme me bomba në qytetet jugore të frekuentuara nga turistët malajzian, ka lënë gjurmë në bizneset e atyshme.
Një seri e sulmeve me bomba në qytetet më të njohura turistike në jug të Bangkokut gjatë këtij muaji, ku u vranë dhe katër persona e dhjetra tjerë mbetën të plagosur, kanë çuar te frika se kryengritja ka filluar të përhapet.
Tajlanda ka parë një rritje prej 10% të ardhjeve prej Lindjes së Mesme në vitin 2015 krahasuar me vitin 2014, bazuar nga të dhënat e Departamentit të Turizmit. /tesheshi.com/
