Gjigantët japonezë të automjeteve Honda dhe Nissan kanë njoftuar planet për t’u bashkuar.
Kjo do t’i bënte ata prodhuesin e tretë më të madh të automjeteve për nga shitjet, pas Toyota Motor Corp dhe Volksëagen AG. Dy kompanitë njoftuan se kanë nënshkruar një memorandum mirëkuptimi, i cili do të përfshijë në negociatat e integrimit edhe anëtarin më të vogël të aleancës Nissan, Mitsubishi Motors.
Prodhuesit japonezë të automjeteve kanë luftuar për t’u përballur me rivalët e tyre të mëdhenj në automjetet elektrike (EV) dhe po përpiqen të mbajnë kostot e ulëta. Nëse bashkimi finalizohet, mund të rezultojë në një kompani me vlerë më shumë se 50 miliardë dollarë bazuar në kapitalizimin e tregut të të tre prodhuesve të automjeteve.
Honda fillimisht do të drejtohej nga menaxhmenti i ri, i cili do të ruante parimet dhe markat e secilës kompani, tha presidenti i Hondas, Toshihiro Mibe. Qëllimi është që marrëveshja të përfundojë deri në gusht 2026, shtoi ai, por tha se ka një risk që mund të mos ecë përpara.
Mibe tha se kishte “pika për të studiuar dhe diskutuar” në lidhje me bashkimin. “Sinqerisht, mundësia që kjo të mos zbatohet nuk është zero”, tha ai.
Pavarësisht nga marrëveshja e mundshme që do ta bënte kompaninë e re një gjigant të industrisë, ajo do të ishte ende pas Toyotas si prodhuesi kryesor i automobilave në Japoni.
Toyota ka nxjerrë 11.5 milionë automjete në vitin 2023, ndërsa Honda, Nissan dhe Mitsubishi Motors nxorrën rreth tetë milionë.
Nissan ka luftuar nën peshën e një skandali që filloi me arrestimin e ish-kreut të saj Carlos Ghosn në fund të vitit 2018 me akuza për mashtrim dhe shpërdorim të aseteve të kompanisë, akuza që ai i mohon. Ai u lirua përfundimisht me kusht dhe u arratis në Liban.
Ai tha se bashkimi i planifikuar ishte një “lëvizje e dëshpëruar”.
Ndërkohë, në Evropë, kompanitë e makinave po shkurtojnë vendet e punës dhe po mbyllin fabrikat pasi përballen me presion nga rritja e eksporteve nga Kina, raportoi këtë muaj redaktori i ekonomisë dhe të dhënave të Sky News, Ed Conway. /tesheshi.com/
