“Trampizimi” i sakaqshëm i Berishës, një imitim tipik makiavelik i tij në sferën delikate të çështjes së sekseve, ka marrë së fundi një goditje nga një prej personazheve LGBT në Shqipëri, Kristi Pinderi, prej kohësh jashtë Shqipërisë, duke kujtuar një të kaluar jo të largët, kur sipas tij, Berisha ishte njeriu që u dha përkrahjen më të madhe në politikën shqiptare. Fjala është për vitet mes mandatit të parë e të dytë të Berishës, kur ky i fundit diktoi ligjërisht të drejta të tyre.
Ja ç’tha Kristi Pinderi në një emission televiziv në një lidhje me scype:
“Sali Berisha do të mbetet në histori si njeriu që mbështeti LGBTQ. Ai dekriminalizoi homoseksualitetin,” tha Pinderi. Ai theksoi se në ligjet për të drejtat e komunitetit LGBTQ ka pasur mbështetje të gjerë politike: “Të gjithë kanë votuar pro ligjit LGBTQ, përveç, mesa mbaj mend, Mesila Dodës.”
Pinderi rrëfeu edhe një moment nga takimi me Berishën, ku ish-kryeministri shprehu publikisht mbështetjen e tij.
“Na ka thënë: Më vjen shumë mirë dhe ju përgëzoj që keni dalë publikisht. Na ka mbështetur dhe përgëzuar, duke na siguruar se do të mbështeste të gjitha përpjekjet tona.”
Duke folur për martesat mes personave të të njëjtit seks, Pinderi tha se Berisha ishte shprehur në favor: “E pyetëm çfarë mendon për martesat gay dhe ai përsëriti qëndrimin se do ta pranonte dhe do të bënte ligjin për martesat gay… dhe e bëri.”
Ai shtoi gjithashtu edhe një moment nga biseda me Berishën, ku ky i fundit e kishte trajtuar çështjen me humor.
“Kur e pyeta prapë në atë takim, ai bëri shaka: Po akoma nuk ju lejojnë të martoheni?”.
Sipas Pinderit, Berisha kishte garantuar komunitetin se nuk do të pengohej për të jetuar jetën e tij dhe për të gëzuar të drejtat e garantuara me ligj.
Dhe në fakt, në të gjithë historinë politike të PD-së, kurrë kjo forcë e vetëquajtur e djathtë nuk ka patur asnjë deklaratë apo qëndrim zyrtar kundër LGBT-së.
Madje dhe kur në tarracën e Bashkisë së Tiranës, me lejen e Veliajt por pa prezencën e tij, do ndodhte një martesë lesbike, ndodhur kjo muaj më parë, nga PD nuk pati asnjë reagim zyrtar për këtë zhvillim të ndyrë në një godinë qeveritare. /tesheshi.com/
