Në 17-vjetorin e vrasjes së deputetit të partisë Demokratike, Azem Hajdari kjo parti është rikthyer në traditën e saj edhe pse në krye qëndron një emër i ri. Lulzim Basha ka mbledhur demokratët dhe simpatizantët e PD-së në një tubim, për nder të deputetit dhe ish-studentit të Dhjetorit, Azem Hajdari.
Homazhet u zhvilluan pranë memorialit të ngritur në vendin ku deputeti u vra 17 vjet më parë, pranë selisë së vjetër të partisë Demokratike.
Basha në fjalën e tij, theksoi se një komb i tërë dhe PD-ja nuk e ka harruar mirënjohjen ndaj Azemit, duke e lidhur edhe me aktualitetin politik të ditës.
“Diktatura nuk ia fali kurrë Azem Hajdarit përmbysjen e madhe e të parikthyeshme, kthimin e lirisë së qytetarit në themel të një shoqërie, mposhtjen e frikës, ekzaltimin e kurajos qytetare. Ndaj krimi i lidhur me pushtetin, shkuli Azem Hajdarin nga gjiri i demokratëve dhe shqiptarëve të lirë më 12 Shtator 1998. Por nuk e shkuli e nuk e shkul dot kurrë nga mirënjohja e demokratëve dhe e një kombi të tërë, nga nderimi për veprën e tij të pavdekshme. Azem Hajdari është gjallë sepse e gjallë është kurajo, vendosmëria e tij për të mos lëshuar kurrë liritë e fituara në Dhjetorin e vitit 1990. Azem Hajdari është gjallë sepse e gjallë është forca kreshnike e Azem Hajdarit në Partinë Demokratike për t’i prirë qytetarëve të lirë, për ta mposhtur dhe një herë krimin e lidhur me pushtet dhe pushtetin e bërë njësh me krimin”, tha Lulzim Basha.
Vrasja e deputetit demokrat solli edhe një sërë zhvillimesh politike në atë kohë. Për vrasjen e tij u proceduan dhe vuajnë dënimin me burg Jaho Salihi dhe Ismet Haxhia. /tesheshi.com/
