Aktorja amerikane Whoopi Goldberg është pezulluar për dy javë nga emisioni “The View” i ABC-së, të cilin ajo e drejton, për shkak se pretendonte se Holokausti nuk ishte i bazuar në racizëm, tha shefi i departamentit të lajmeve Kim Godwin.
Pavarësisht se 66-vjeçarja Goldberg kërkoi dy herë falje për deklaratën që shkaktoi zemërim dhe kritika publike, fillimisht të hënën në emisionin “The Late Show”, dhe më pas në emisionin e radhës “The View” mëngjesin e së martës, ABC News beson se nuk mjafton.
“(Vendimi) hyn në fuqi menjëherë – Unë pezulloj Whoopi Goldberg për dy javë për komentet e saj të gabuara dhe të dëmshme,” shkroi Godwin në Twitter në llogarinë e marrëdhënieve publike të ABC.
“Edhe pse Whoopi kërkoi falje, i kërkova asaj që të merrte pak kohë për të menduar dhe kuptuar ndikimin e deklaratave të saj. Të gjithë punonjësit e ABC News janë në solidaritet me kolegët, miqtë, familjet dhe komunitetet tonë hebrenj”, tha Godwin.
“Në emision thashë se Holokausti nuk ishte i bazuar në racizëm, por se kishte të bënte me ‘çnjerëzimin e njeriut ndaj njeriut’. Duhet të kisha thënë se ishte për të dyja këto gjëra. Populli hebre në mbarë botën ka pasur gjithmonë mbështetjen time dhe do të mbetet i tillë. Më vjen keq për dhimbjen që shkaktova”, tha Goldberg në një falje.
Reagime të shumta dënuese
Tema e Holokaustit u ngrit në emision kur u diskutua për vendimin e shkollës në Tenesi për të përjashtuar romanin “Maus: A Survivor’s Tale”, i cili flet për kampet naziste nga Lufta e Dytë Botërore. Duke bërë këtë, Whoopi, ndër të tjera, tha se Holokausti nuk kishte asnjë lidhje me racizmin.
“Bëhet fjalë për supremacinë e bardhë. Ata kryen krime kundër hebrenjve dhe romëve”, tha kolegia e saj Ana Navarro, për të cilën Goldberg tha se ishin “dy grupe të bardhësh”.
Mendimi i saj zemëroi shumë njerëz.
“Whoopi, mendimi yt është i gabuar. Holokausti ishte rezultat i shkatërrimit sistematik nazist të popullit hebre. Nazistët i konsideronin hebrenjtë si një racë inferiore”, shkroi në Twitter Jonathan Greenblatt, drejtor i Lidhjes Hebraike Anti-Shpifje.
Meghan McCain, e cila dikur ishte një nga drejtueset e “The View” shkroi: “Antisemitizmi është një helm që justifikohet gjithnjë e më shumë në kulturën tonë, dhe për rrjedhojë edhe në televizion”. /tesheshi.com/
