Skenaristi fitues i oskarit, David Franzoni është duke shkruar skenarin për një film biografik mbi jetën e poetit pers të shekullit 13-të, Jalaluddin Rumi.
Franzoni, skenaristi i filmit “Gladiator” synon që përmes këtij filmi të “sfidojë portretizimin stereotipik të personazheve mysliman në Hollivud”, shkruan The Guardian.
“Rumiu është si Shakespeare”, thotë Franzoni. “Është një karakter me talent të jashtëzakonshëm dhe me vlerë të madhe për shoqërinë dhe popullin e tij, i cili qartazi rezonon edhe sot e kësaj dite. Njerëz të këtillë ia vlen që të eksplorohen gjithmonë”.
Franzoni ka vizituar Stambollin në Turqi, për të takuar njohësit e jetës dhe veprimtarisë së Rumit, në mënyrë që ekipi të mund të fillojë xhirimet që në fillim të vitit të ardhshëm.
Ai poashtu ka vizituar mausoleumin në Konya të Turqisë.
Veprat epike shpirtërore dhe mistike, Masnavi dhe Divan, konsiderohen si poezitë më të mëdha të njohura ndonjëherë, të përkthyera në shumë gjuhë të botës.
Mësuesi Sufi, i cili si i ri u largua nga vendlindja e tij – Afganistani i sotëm – gjatë invazionit të mongolëve, udhëtoi nëpër Bagdad, Mekë dhe Damask me familjen e tij si refugjatë para se të vendoset në Konya të Turqisë së sotme, ku edhe vdiq në moshë të thyer.
Një prej pjesëve kyçe të filmit pritet të jetë takimi i Rumiut me mistikun enigmatik Shams nga Tabriz, takim ky i cili ndryshon kursin e jetës së tij. Pas zhdukjes mistike të Shams, Rumi i hidhëruar shkruan pjesën më të madhe të poezive me të cilat është i njohur në Perëndim, dhe të cilat e kanë bërë poetin më të shitur në SHBA.
Franzoni dhe producenti Stephen Joel Brown (Se7en dhe The Fugitive), gjatë një interviste për The Guardian, kanë zbuluar ëndrrën e tyre që Leonardo DiCaprio të luajë rolin e Rumiut, kurse Robert Downey Jr. rolin e Shams nga Tabriz.
Normalisht kjo ka shkaktuar zemërim dhe kritika në rrjetet sociale, veçanërisht Twitter, ngase për rolin e poetit të lindur në Afganistan është përzgjedhur një aktor jashtëzakonisht biond, dhe aq më tepër në tentativën e skenaristit dhe regjisorit, pikërisht “për të sfiduar portretizimin stereotipik të personazheve mysliman”.
Normalisht, këto reagime kanë ardhur pasi Akademia për ndarje të çmimeve Oscar është akuzuar për diskriminim racor me rastin e ndarjes së çmimeve, ku për të dytin vit me radhë nuk ka pasur asnjë aktor me ngjyrë apo nga radha e minoriteteve që janë nominuar për kategorinë e protagonistëve kryesor dhe dytësor, si për femrat ashtu edhe për meshkujt. /tesheshi.com/
