Nëse ka një grua që mund të mos e llogarisësh në llogoren e feminizmit në Hollivud, kjo është Meryl Streep. Bota e internetit u shfrenua në komente ndërsa fituesja e çmimeve të shumta Oscar zgjodhi të mos e e etiketonte veten me shkronjën F, për feministe, gjatë një interviste të saj…
Përgjigja e Meryl Streep: jam humaniste
E pyetur nga Time Out nëse ajo e ndjente veten një feministe, Streep u përgjigj: Unë jam një humaniste. Jam për një ballancim të mirë”. Kjo përgjigje është surprizë kur vjen nga nja grua që ka lobuar për Amendamentin e të Drejtave të Barabarta në vendin e saj të lindjes dhe që është filmuar me grushta në ajër ndërsa ndiqte fjalimin për të drejtat e grave nga Patricia Arquette gjatë ceremonisë së ndarjes së çmimeve Oscar.
Për të mos përmendur që intervista në fjalë po jepej për filmin e saj më të ri, Suffragette, në të cilin ajo luan një heroinë, Emmeline Pankhurst.
Por, Streep nuk është e vetmja aktore që e radhit veten tek humanistet më shumë sesa tek kauza e feminizmit.
Sarah Jessica Parker zhgënjeu disi gratë kur tha se pabarazia “nuk është më çështje për gratë. Ne do të ishim shumë më tepër të fuqishme nëse kauza jonë do të ishte një lëvizje humaniste”.
Susan Sarandon gjithashtu e konsideron veten si një humaniste më shumë sesa një feministe “e tjetërsuar”.
Ndërkaq, duke e sjellë debatin më thellë, Marion Cotillard këmbënguli gjatë një interviste se “feminizmi nuk krijon barazi, krijon ndarje. Nuk e klasifikoj veten si një feministe”.
A duhet promovuar më shumë humanizmi sesa feminizmi?
Analistët thonë se të dyja konceptet duhet të mbeten të ndara.
“Arsyeja përse quhet feminizëm, ndërsa merret në mbrojtje barazia gjinore është për shkak se femrat janë më të paprivilegjuara, e më pak të përkujdesura. Arrin barazinë gjinore kur të kujdesesh për të drejtat e gjinisë më të paprivilegjuar”, thonë ata.
Të tjerë argumentojnë se ndërsa humanizmi dhe feminizmi kanë të njëjtin ideal në thelb, trajtimin e barabartë për të gjithë, humanizmi nuk merret me politikat gjinore, por i ka rrënjët në patriarkat e “supozon se ekziston vetëm një ide për atë që është humane”.
Hillary Clinton
Streep mund të mos dojë të etiketohet si feministe, por ka shumë femra të profilit të lartë që e etiketojnë veten me qejf si të tilla. Kështu ish-sekretarja amerikane e Shtetit, Hillary Clinton. Përgjigjet e saj në këtë drejtim nuk mund të keqkuptohen:
“Ndihem gjithnjë pak e habitur sesi gratë, e cilësdo moshë por sidomos të rejat, thonë gjëra të tilla, ‘unë besoj në të drejtat e barabarta, por nuk jam feministe’. Jo, një feministe nga përcaktimi është dikush që beson në të drejtat e barabarta”, thotë ajo.
Përgatiti: Juli Prifti – /tesheshi.com/
