Presidenti në largim i Francës, Francois Hollande, ka një merak të fundit përpara se ta lërë postin. Në një intervistë të botuar në një seri gazetash me emër në Europë, si në francezen Le Monde, italianen La Stampa, apo në britaniken The Guardian, ai deklaron se detyra e tij e fundit është të pengojë fitoren e Marine Le Pen-it në zgjedhjet e ardhshme presidenciale.
“Detyra ime e fundit është të garantoj që Franca nuk do të bëhet për vete nga një program i tillë, e se Franca nuk e përballon një përgjegjësi të tillë të rëndë.”
Hollande thotë në intervistë se rreziku që të fitojë Marine Le Pen-i është i pranishëm, pasi, sipas tij, “e djathta ekstreme nuk ka patur një nivel të tillë të lartë [mbështetjeje] prej 30 vitesh”.
Sondazhet e deritanishme e nxjerrin në fakt Le Pen-in në balotazh, por nuk i japin asnjë mundësi fitoreje në këtë fazë të zgjedhjeve të ardhshme.
E ja çfarë paralajmëron Hollande, “Nëse kandidatja e Frontit Kombëtar fiton, ajo do të nisë menjëherë një proces daljeje nga eurozona, e madje nga Bashkimi Europian.”
Në prag të përfundimit të mandatit të tij presidencial, Francois Hollande kujton se zgjedhjet e 23 prillit dhe të 7 majit në Francë për atë që do ta pasojë në detyrë, “do të përcaktojnë jo vetëm rrugën e vendit, por gjithashtu të ardhmen e Europës”.
Zgjedhjet në Francë janë një moment kyç për BE-në, të mbërthyer nga pështjellimi. /tesheshi.com/
