Spanjollët kanë dështuar në dy aktivitetet e fundit futbollistike, në Botëror dhe në Europian, por kanë ditur të rikthehen furishëm me uljen në stol të Lopetegui-t e me ca freskime në skuadër.
Ritmi i pandalshëm në eliminatoret për botërorin Rusi 2018 është shoqëruar mbrëmë me një fitore spikatëse në “Stade de Francë” të Parisit, ku kanë fituar 0-2 ndaj përfaqësueses së “gjelave”.
Takimi miqësor ka patur, gjithsesi, një të veçantë tjetër. Ai do të kishte përfunduar 1-1 pa ndërhyrjen e teknologjisë, falë së cilës u anulua një gol i Griezmann-it dhe u njoh një tjetër nga Deulofeu.
Rezultatin do ta ndryshonte së pari David Silva pas realizimit të një 11-metërshi në minutën e 68-të, të thelluar më tutje me golin e Deulofeu-t.
Në Amsterdam, në miqësoren e dytë për nga pesha të së martës, Holanda humbi 1-2 me Italinë.
Kjo qe humbja e dytë për holandezët në pak ditë, pas asaj ndaj Bullgarisë në kualifikueset. Golat u shënuan të tre nga italianët; njëri prej tyre qe autogol.
Holandezët ngjajnë në këtë moment me përfaqësuesen shqiptare për nga paraqitjet dhe rezultatet, por nëse trajneri Blind u shkarkua, De Biasi vazhdon të qëndrojë në detyrë.
Surprizuese fitorja 2-3 e Suedisë ndaj Portugalisë pritëse; po kaq surprizuese ishte fitorja 3-0 e Estonisë ndaj Kroacisë.
Me të njëjtin rezultat, 3-0, Maqedonia mposhti Bjellorusinë, ndërkohë që takimi miqësor me më shumë gola qe ai mes Rusisë dhe Belgjikës, i përfunduar 3-3.
Irlanda karshi Islandës, një 90-minutësh që u fitua 0-1 nga udhëtuesit; i vetmi barazim, 1-1, u regjistrua në sfidën midis Austrisë dhe Finlandës. /tesheshi.com/
