Çuditërisht, Hofenhajmi është i vetmi ekip i kampionatit gjerman që ka një zero te rezultatet: atë të humbjeve!
Gjashtë fitore, nëntë barazime e asnjë humbje në 15 javë! Një bilanc që e rendit Hofenhajmin të tretin në klasifikimin e Bundesligës.
Hofenhajmi nuk iu dorëzua as Borusias së Dortmundit mbrëmë, në ndeshjen hapëse të javës së 15-të. Madje Hofenhajmi, skuadra pritëse, tentoi dhe ta fitonte ndeshjen, duke kaluar dy herë në epërsi; një tentativë e papërmbushur nga barazimi i miqve.
Ky takim përfundoi 2-2, me të katër golat të shënuar brenda 48 minutave. Vendasit kaluan në epërsi që në minutën e 3-të, kur shënoi Mark Uth. Barazimi do të vinte nga goli i Götze-s, jo shumë më pas. Hofenhajmi provon dhe një herë të jetë në avantazh. Wagner tund rrjetën e miqve në të 20-n minutë. I zakonshmi Aubameyang vendos barazpeshën pak pas nisjes së pjesës së dytë.
Për Borusian e Dortmundit ky qe i dyti barazim në dy javë, pas atij ndaj Këlnit të shtunën e shkuar. E pesta në renditje, Borusia mund të zbresë dhe më poshtë pas takimeve të tjera që do të luhen sot. /tesheshi.com/
