Philip Barlow, një mjek ligjor i një gjykate në jug të Londrës, tha se vdekja e 9-vjeçares Elle Kissi-Debrah në shkurt 2013, ishte shkaktuar nga dështimi akut i frymëmarrjes, astma e rëndë dhe ekspozimi ndaj ndotjes së ajrit.
Me këtë “gjykim” ai hyri në historinë juridike.
Barlow tha se vajza ishte e ekspozuar ndaj dioksidit të azotit dhe ndotjes së grimcave (PM) më të larta se sa lejohet sipas udhëzimeve të Organizatës Botërore të Shëndetësisë.
Mjeku ligjor gjithashtu tha se dështimi për të ulur nivelin e ndotjes në kufijtë ligjorë ndoshta kontribuoi në vdekjen e saj, si dhe dështimi për t’i dhënë nënës informacione rreth potencialit të ndotjes së ajrit, e cila çoi në përkeqësimi e astmës së vajzës.
“Elle vdiq nga astma e kontribuuar nga ekspozimi ndaj ndotjes së tepërt të ajrit,” tha mjeku.
Barlow tha se gjatë jetës së Elle-s, emetimet e dioksidit të azotit në Lewisham, ku ajo jetoi, tejkaluan kufijtë ligjorë, shkruan The Guardian.
Mjeku ligjor tha se efektet shëndetësore të ndotjes së ajrit janë të njohura për shumë vite, ndaj dhe fëmijët me astmë janë veçanërisht të rrezikuar.
Ai zbuloi se ndotja e ajrit njëkohësisht shkaktoi dhe përkeqësoi formën e veçantë të astmës së rëndë të Elle-s.
Vendimi është i pari i këtij lloji në MB dhe ka të ngjarë të rrisë presionin mbi qeverinë për të trajtuar ndotjen e tepruar.
Nëna e Elle-s, Rosamund Kissi-Debrah, një ish-mësuese, kaloi vite duke luftuar për të denoncuar vdekjen e vajzës së saj nga një gjykatë në tjetrën. Këmbëngulja e saj u shpagua të mërkurën kur Barlow ra dakord me provat mjekësore të siguruara nga familja, të cilat thanë se ndotja e ajrit kishte përkeqësuar formën e veçantë të astmës akute të Ella-s.
Avokatët e nënës argumentuan se ndotja e ajrit ishte një alarm për shëndetin publik dhe se kishte një nevojë urgjente për ta regjistruar atë si një shkak të vdekjes për të siguruar që programet e shëndetit publik për të luftuar ajrin toksik, të kishin përparësi.
Prof. Stephen Holgate, një imunofarmakolog dhe këshilltar i sëmundjeve të frymëmarrjes në Universitetin e Southampton-it, si dhe në Spitalin e Përgjithshëm të Southampton-it, tha se shkaku biologjik i përkeqësimit të sëmundjes së Elle-s në muajt e dimrit është përkeqësimi sezonal i ndotjes së ajrit.
Ai tha se efekti kumulativ i ajrit helmues që Elle po thithte së bashku me ajrin, ndërsa jetonte brenda 30 metrash nga unaza jugore, shkaktoi sulmin e saj të fundit akut të astmës.
Holgate tha se Elle ishte si një kanarinë në një minierë qymyri.
Elle kishte kriza të shumta dhe u dërgua në spital gati 30 herë në tre vite para se të shuhej .
Vendimi për të hetuar, marrë në 2014, i cili përcaktoi se ajo vdiq nga dështimi akut i frymëmarrjes, u rrëzua nga një gjykatë e lartë. Por pas provave të reja të niveleve të rrezikshme të ndotjes së ajrit pranë shtëpisë së saj, gjyqi u rihap.
Kryebashkiaku i Londrës Sadiq Khan tha se përfundimi i mjekut ligjor ishte një “moment i rëndësishëm” dhe e quajti ndotjen një “krizë të shëndetit publik”.
“Sot duhet të jetë një pikë kthese në mënyrë që fëmijë të tjerë të mos vuajnë si Elle. Ndotja toksike është një krizë e shëndetit publik, veçanërisht për fëmijët tanë dhe hetimi ka theksuar edhe një herë rëndësinë e promovimit të politikave të guximshme të tilla si zgjerimi i zonës së emetimeve ultra të ulta në Londrën e brendshme”, shtoi Khan. /tesheshi.com/
