Një zhvillim shumë i rëndësishëm rajonal do të nisë këtë vjeshtë. Beogradi ka vendosur që në territorin e saj të zhvillohet për herë të parë në historinë e vendit më prorus në Ballkan, një stërvitje e NATO-s, organizatës që e bombardoi këtë vend në vitin 1999 për të ndalur makinën ushtarake të Sllobodan Millosheviçit.
Është televizioni serb B92 që ka bërë publik lajmin duke cituar burime nga Ministria serbe e Mbrojtjes.
Siç bën të ditur televizioni serb, stërvitja bëhet në kuadrin politik të bashkëpunimit të Beogradit me NATO-n në suazën e statusit të vëzhguesit.
Prezenca ushtarake e vendeve të NATO-s në fakt nuk është e para, pasi ka disa vite që një brigadë amerikane ushtron një mision humanitar në Luginën e Preshevës, por zyrtarisht një manovër ushtarake zhvillohet për herë të parë.
Stërvitja është koduar me emrin REGEX18 dhe do të marrin pjesë disa shtete të NATO-s. Serbia, merr pjesë në kuadrin e programit “Partneriteti për Paqe”, që në fakt është paradhoma e hyrjes në Aleancës së Atlantikut të Veriut.
B92, që njihet për qëndrimet hapura pro-perëndimore, thekson se politika e paqartë e Beogradit për të mos deklaruar prerë linjën politike, krijon konfuzion në popullsi por edhe te Moska që Vuçiç ka deklaruar se do të jetë sërish aleat i ngushtë, ndërkohë që edhe NATO-s e SHBA i thotë të njëjtën gjë.
“Kjo lloj politike, thjesht nuk është serioze”, shkruan B92. /tesheshi.com/
