Historike: Ministri i Jashtëm i Sirisë, udhëtimin e parë zyrtar në Saudi

Ministri i Jashtëm i Sirisë, Asaad Hassan al-Shibani, ka konfirmuar vizitën e tij të parë zyrtare jashtë vendit në Arabinë Saudite, pas një ftese nga homologu i tij saudit, Princi Faisal bin Farhan bin Abdullah. “Jam i nderuar të përfaqësoj vendin tim në këtë vizitë historike,” tha al-Shibani përmes një postimi në platformën X të hënën. Ai e përshkroi këtë hap si një gjest vullneti të mirë dhe një mundësi për të rikthyer rolin e Sirisë në rajon pas përmbysjes së Bashar al-Assadit më herët këtë muaj.

Al-Shibani, i emëruar ministër më 21 dhjetor nga qeveria e përkohshme siriane, do të zhvillojë këtë vizitë në javën e parë të vitit të ardhshëm. Gjatë një konference të përbashkët për shtyp me ministrin e Jashtëm të Kuvajtit, Abdullah al-Yahya, në Damask, ai bëri thirrje për rihapjen e ambasadës kuvajtiane dhe rikthimin e marrëdhënieve diplomatike mes dy vendeve.

Vizita e al-Yahya në Damask përfaqëson një qasje të re rajonale për të forcuar bashkëpunimin pas ndryshimeve politike në Siri. Duke folur për mediat, al-Yahya vlerësoi përgjigjen e qeverisë së re siriane ndaj këtyre përpjekjeve dhe bëri thirrje për rishikimin e sanksioneve ndërkombëtare kundër Sirisë, duke nënvizuar nevojën për ndihmë të menjëhershme humanitare.

Sekretari i Përgjithshëm i Këshillit të Bashkëpunimit të Gjirit (GCC), Jasem Mohamed Al-Budaiwi, i cili gjithashtu vizitoi Damaskun, theksoi gatishmërinë e vendeve të Gjirit për të investuar në Siri dhe për të ndihmuar në rindërtimin e infrastrukturës së shkatërruar nga lufta civile.

Shtetet arabe sunite kishin bojkotuar Sirinë nën sundimin e al-Assadit për shkak të aleancës së tij me Iranin dhe Rusinë. Megjithatë, ndryshimet e fundit politike dhe rënia e al-Asadit kanë hapur rrugën për rivendosjen e marrëdhënieve rajonale dhe integrimin e Sirisë në botën arabe.

Ndërkohë, gjatë ditës së hënë, liderët sirianë zhvilluan gjithashtu takime me homologë nga Ukraina, ku u njoftua një partneritet i ri strategjik dhe dërgesa e parë e ndihmës ushqimore nga Ukraina drejt Sirisë.

Vizita e ardhshme e al-Shibani në Arabinë Saudite konsiderohet një moment kyç në përpjekjet e Sirisë për të përmirësuar marrëdhëniet rajonale dhe për të siguruar investime të domosdoshme për rimëkëmbjen ekonomike. /Tesheshi.com/