Kryeministri maqedonas Zoran Zaev ka përgëzuar kryeministrin grek Aleksis Tsipras për ratifikimin e Marrëveshjes së Prespës, të cilin e quajti “një mik”. Marrëveshja që u votua nën zjarrin e protestave nacionaliste në parlamentin e Greqisë, vulos emrin e ri të Maqedonisë, në Maqedoni Veriore dhe ndërprerjen e bllokadës greke ndaj Shkupitpër anëtarësim në NATO e BE, por mbi të gjitha në përafrimin tregtar mes dy fqinjëve .
Zaev i tha Tsiprasit se ata, së bashku me popujt e tyre, arritën një “fitore historike”.
“Marrëveshja e Prespës është e gjallë, për paqen e përjetshme dhe përparimin në Ballkan dhe në Evropë”, tha Zaev në llogarinë e tij zyrtare në Twitter.
Kryeministri grek tha se sot është një ditë historike për shkak se Greqia mban një pjesë të rëndësishme të historisë dhe trashëgimisë së Maqedonisë së lashtë greke dhe se është shkruar një “faqe e re në historinë e Ballkanit”.
“Urrejtja e konflikteve dhe e kundërshtive nacionaliste, do t’i japë rrugë miqësisë, paqes dhe bashkëpunimit”, tha Tsipras në llogarinë e tij në Twitter.
Tsipras shtoi se brezi i ri në të dyja vendet do të jetë i inkurajuar nga ata që kishin guximin për të hedhur themelet e “një të ardhme të paqes, solidaritetit dhe bashkëjetesës paqësore të të dy popujve”.
“Maqedonia Veriore, e lindur sot, do të jetë një vend mik dhe një aleat i Greqisë”, shkroi ai.
Ratifikimi i Marrëveshjes së Prespës në parlamentin grek, ka sjellë reagime pozitive dhe nga faktori jashtë rajonit.
Presidenti i Komisionit Evropian Jean-Claude Juncker, Përfaqësuesja e Lartë e BE-së për punë të jashtme Federica Mogherini dhe Komisioneri për zgjerimin e BE-së Johannes Hahn, në një deklaratë të përbashkët e përshëndetën ratifikimin e Marrëveshjes së Prespës.
“Që nga fillimi, BE-ja ka mbështetur fuqishëm marrëveshjen historike, e cila ishte nënshkruar nga kryeministrat e Tsipras dhe Zaev, të udhëhequr nga Kombet e Bashkuara. Ajo mori guxim politik, udhëheqjen dhe përgjegjësinë e të gjitha palëve, në mënyrë për të zgjidhur një nga kontestet më serioze në rajon”, u tha në deklaratën e BE-së, me vlerësimin se të dy vendet kanë përdorur “një mundësi unike dhe kanë dhënë një shembull pajtimi në të gjithë Evropën dhe e cila duhet të nxisë perspektivën evropiane të rajonit”.
Presidenti i Këshillit të Evropës, Donald Tusk uroi dy kryeministrat duke thënë se “ata kishin imagjinatën, morrën në sy rrezikun; ata ishin të gatshëm të sakrifikojnë interesat e tyre për të mirën e kombeve. Zoran dhe Alexis, mision juaj i pamundur rezultoi i suksesshëm”, shkroi Tusk në Twitter.
Ratifikimi u përshëndet gjithashtu nga Sekretari i Përgjithshëm i NATO-s, Jens Stoltenberg, i cili tha se marrëveshja është një kontribuese e rëndësishme për stabilitetin dhe prosperitetin e të gjithë rajonit.
“Unë pres pranimin e ardhshëm të Republikës së Maqedonisë Veriore në NATO“, tha Stoltenberg.
Këshilltari amerikan për sigurinë kombëtare, John Bolton ka përgëzuar kryeministrat e Greqisë dhe Maqedonisë, duke shtuar se SHBA mbështet një “arritje të rëndësishme që do të promovojë stabilitet dhe prosperitet në Ballkan.”
Urime për Marrëveshjen e Prespës erdhën nga Prishtina dhe Tirana. Presidenti Hashim Thaçi dhe Ministri i Jashtëm Behgjet Pacolli përshëndetën ratifikimin e marrëveshjes.
“Ky është një lajm i mirë për të gjithë rajonin dhe një përpjekje e fortë për të mbyllur të gjitha çështjet e hapura midis vendeve të Ballkanit”, tha Thaçi.
Gjithashtu dhe nga Tirana, presidenti Meta, kryeministri Rama e kreu i opozitës Basha, uruan Tsiprasin dhe Zaevin për arritjen historike dhe fundin e një konflikti të gjatë midis dy vendeve. /tesheshi.com/
