Dyshja Basha – Kryemadhi, në një dalje për mediat kanë ftuar qytetarët për të dalë masivisht në protestën e së shtunës kundër qeverisë dhe personalisht Edi Ramës si kryeministër. Kryedemokrati dha garanci se protesta nuk do ketë asnjë element dhune, dhe se infot e shpërndara për skenare me dhunë janë fake news-e të dala nga qeveria.
“Për çdo informacion e fake news që shpërndahet për një skenar ndryshe nga ai i një proteste shpreh panik. Paniku është i justifikuar, pasi nesër do të marrë formë bashkimi i madh i shqiptarëve për ndryshim, pavarësisht dallimeve. Ne na bashkon dëshira për ndryshim. Shqiptarët e kanë kuptuar kështu nuk vazhdohet më. Balanca është vendosur në krahun e shqiptarëve të ndershëm. Nuk ka më institucione që mund të mbajnë peng të ardhmen”, tha Basha.
Dhunën e përjashtoi si mundësi edhe znj. Kryemadhi.
“Ftoj të gjithë shqiptarët të marrin pjesë, nuk do të ketë dhunë. Do të marrim masa të mos jemi pre e provokimeve të punonjësve civilë të shtetit. Protesta e nesërme do të jetë jo vetëm paqësore, por edhe më madhështorja. Do të protestojmë sepse duam të jetojmë në Shqipëri”.
Kjo protestë, por dhe ajo para një muaji në rastin e zgjedhjes së Kryeprokurorit të përkohshëm, konfirmon aleancën e re PD-LSI, tashmë në kushte opozite, përballë Edi Ramës në pushtet. 8 vjet më parë, dy forcat do bëheshin bashkë për herë të parë, po përballë Ramës, për të lënë në opozitë.
Ndryshim tjetër është fakti se atë kohë protagonist ishin Berisha e Meta, sot janë Basha e Kryemadhi. /tesheshi.com/
