“Muslimanët e parë që mbajtën Ramazan në Amerikë ishin skllevërit që shkonin nëpër fusha për t’u falur”, shpjegon Qasim Rashad ndërsa tregon historinë në zyrën e tij të organizatës “Muslimanët e Bashkuar” në Filadelfia.
Ndërkaq, profesori Sulayman Nyang nga Universiteti i Hauardit është ekspert për Islamin në Shtetet e Bashkuara dhe thotë se 10 për qind e skllevërve afrikanë të sjellë në Amerikë ishin me prejardhje muslimane. Burime të tjera thonë se kjo përqindje shkon deri në 30.
Sot, afro-amerikanët përbëjnë një pjesë të madhe të komunitetit musliman të vendit.
Në një raport nga qendra e Kërkimeve Pew, thuhet se 40 për qind e muslimanëve të lindur në Amerikë janë afro-amerikanë. Shumë prej tyre u konvertuan në Islam gjatë viteve 1960 dhe 1970, pjesërisht nga ndikimi i “Kombit të Islamit”. Në vitet 1970, Warith Deen Mohammed drejtoi shumicën e mbështetësve të “Kombit” drejt Islamit tradicional suni.
Në komunitetin afro-amerikan të Filadelfias, Ramazani mbahet si kudo gjetkë. Familjet zgjohen herët për të konsumuar syfurin, ushqimin përpara lindjes së diellit, dhe agjërojnë për 16 orë në ditë, kohëzgjatje tipike për verëm e Amerikës së Veriut.
Shumë muslimanë vendas ofrojnë iftarë për komunitetin, sikundër organizojnë edhe ngjarje edukative dhe klasa mësimore përgjatë gjithë muajit. Iesha Prime, një figurë e mirënjohur në të gjithë komunitetin musliman në Amerikë, iu adresua qindra njerëzve të mbledhur në Filadelfia në një prej këtyre aktiviteteve duke thënë: “Mund të duket se ne jemi mposhtur dhe zbuar. Mund të duket se si komunitet, ne jemi pas. Por, në të vërtetë, -kur Zoti ju krijoi – krijoi gjuhën dhe ngjyrën tuaj për një arsye”.
Tregjet hallall, libraritë e kulturës Islame dhe veshjet Islame janë të kudondodhura në Filadelfia, dhe duket e vështirë të shëtisësh në ndonjë lagje të qytetit dhe të mos gjesh të paktën pak prani muslimane. “Al Jazeera” sjell përmes fotografive aspekte të jetës së komunitetit musliman në Filadelfia.
Përgatiti: Juli Prifti – /tesheshi.com/
