Nga Bashkim Kastrati
Heqja dorë nga konsumimi i duhanit konsiderohet si një nga vështirësitë apo sfidat më të mëdha të duhanpirësve. Disa heqin dorë edhe pse e kanë konsumuar një kohë të gjatë, disa heqin dorë por i rikthehen sërish.
Në të shumtën e rasteve duhet një motiv për ta lënë konsumimin e duhanit. Por një qytetar nga Komuna e Kaçanikut, përveç që e ka lënë konsumimin e duhanit, ka dhënë një shembull të mirë edhe për duhanpirësit e tjerë.
Ai është Shaban Guri, i cili tregon në një intervistë për tesheshi.com se si vendosi ta lë duhanin dhe të fillojë grumbullimin e parave që do të shpenzonte për blerjen e pakove me cigare. Ai thotë se si besimtar, feja ka ndikuar që ai ta marrë vendimin për ta lënë duhanin. Por Guri shkoi edhe më tutje, ai filloi grumbullimin e parave për të vizituar vendet e shenjta Mekën dhe Medinën, përkatësisht të bëjë Umra-n.
Ai na tregoi se në këtë udhëtim do të niset sot dhe shprehet i lumtur që i është realizuar ëndrra jetësore që t’i vizitojë këto vende të shenjta.
“Duhanin vendosa ta lë për shkak të besimit fetar, pra që jam mysliman dhe të dëmeve shëndetësore që shkakton duhani. Pastaj me kalimin e kohës si me shaka me bashkëshorten bisedonim se ku mbeten paratë e duhanit, pasi prapë në fund të muajit ishim pa lekë. Vendosem t’i grumbullojmë paratë për aq paketa cigare blija, t’i venim në një arkë të mbyllur. Herën e parë grumbulluam 1800 euro dhe me ato para kemi blerë pajisje për shtëpi”, thotë Guri.
Ndërsa për iniciativën për të bërë Umrën thotë se e ka këshilluar një imam, duke e inkurajuar se kjo gjë mund të arrihet lehtë nëse ka vullnet për të kursyer nga pak para për çdo ditë.
“Pas një këshille nga një imam, emri i të cilit nuk po me kujtohet, i cili më tha se fare lehtë bëhen paratë për Haxh nëse i lë pa pirë dy kafe në ditë. Kështu që për rreth dy vite e gjysmë kam grumbulluar 2000 euro”, thotë Guri.
“Dëshira për ta vizituar Medinën dhe Mekën nuk më ka lënë rehat”
Pas marrjet së këtij vendimi Shaban Guri ka blerë një arkë ku mund t’i lë për çdo ditë paratë që do t’i shpenzonte për blerjen e cigareve, ndërsa thotë se kjo gjë me kalimin e kohës u bë e lehtë për të, derisa arrimi shumën që e kishte vënë si qëllim. Ai në fotografi na tregon shumën prej 2000 eurove, e gjithë kjo shumë është e grumbulluar me monedha metalike.
“Paratë kam vendosur që t’i mbledhë në monedha të hekurit sepse ruhen më lehtë. Umren kam vendos ta bëj me këto para sepse më ka udhëzuar Allahu dhe dëshira për ta vizituar Medinën dhe Mekën nuk më ka lënë rehat”, u shpreh Guri.
Shaban Guri pas realizimit të objektivit të tij, u bënë thirrje të gjithë duhanpirësve që ta lënë konsumin e duhanit dhe t’i grumbullojnë paratë që do t’i shpenzonin për blerjen e duhanit, për t’i investuar në mirëqenien e tyre ose në realizmin e ëndrrave të tyre.
“Duhanpirësve ju rekomandoj që të marrin mësim nga rasti im, sepse vitet shpejt kalojnë dhe habitesh kur i sheh se i ke bërë paratë për një makinë apo laptop, apo ndonjë gjë tjetër, pra që ëndrrën ta bëjnë realitet dhe gjithashtu e ruan shëndetin”, thotë Guri.
Ndryshe, konsumimi i duhanit shkakton probleme të shumta shëndetësore dhe konsiderohet si një nga shkaktarët kryesorë të vdekjeve. Sipas Organizatës Botërore të Shëndetësisë, rreth gjashtë milionë njerëz vdesin çdo vit nga përdorimi i duhanit, një shifër e cila parashikohet të rritet në më shumë se 8 milionë në vit deri në vitin 2030. /tesheshi.com/
