Historia e një triumfi në zgjedhje me 67 për qind të votave vjen nga Guatemala, ku një konservator si e përshkruan veten komediani Jimmy Morales, me origjinë nga shtresat e varfra ka shfrytëzuar valën e indinjatës së popullit nga politika. Jimmy Morales ka treguar barcaleta për të shpjeguar për elektoratin programin e tij.
“Ju kam bërë të qeshni si komedian, ju premtoj se nuk do ju bëj të qani si president”. Në fund të ditës, slogani i zgjedhjeve ka funksionuar: aktori Jimmy Morales është marrë seriozisht nga njerëzit dhe ka fituar zgjedhjet në Guatemala.
Në balotazhin e së dielës, ai ka mposhtur ish-zonjën e Parë të vendit, Sandra Torres me më shumë se 67 për qind të 1.4 milionë votave të hedhura. Ky është një rezultat befasues, që vjen një muaj pas dorëheqjes dhe arrestimit të Otto Perez Molina, tashmë në burg për një skandal korrupsioni.
Morales përdori në fushatë elementët e thyerjes me politikën, duke veshur fanellën e kombëtares së futbollit të Guatemalës për të bërë fushatë. Ja historia e tij:
Eshtë 46 vjeç, i martuar dhe baba i katër fëmijëve. Aktori komik ka qenë edhe producent televiziv, ka studiuar ekonomi dhe teologji. Ka doktoraturë për sigurinë strategjike. Bir i një shitëseje ambulante, ai është simboli i njeriut që “mbiu” nga asgjëja. Reputacionin e fitoi përmes roleve komike në filma dhe transmetime televizive.
Fushata me slogan filmi
Konservator, larg panoramës progresiste, Morales është një evangjelist praktikant me deklarata të forta kundër martesave gay dhe abortit. Sllogani i fushatës së tij është marrë borxh nga një personazh që ka interpretuar në një film. “As i korruptuar, as hajdut”. Personazhi që e ka thënë këtë shprehje në film ishte një fshatar i zhgënjyer që kishte ëndërr të bëhej presidenti i vendit.
Fushatë me barcaleta
Sipas analistëve, familjariteti i Morales me skenat e telekamerat i ka bërë për vete njerëzit. Por, më së shumti ai ka fituar pasi bëri për vete zgjedhësit me thjeshtësinë e mesazheve që dha: “Varfëria është pasojë e korrupsionit”, “Nuk mund të shpenzojmë miliona në fushata zgjedhore, në një vend ku fëmijët vdesin nga uria”. Ishin këto disa nga “kuajt” e tij të betejës. Shpesh ka treguar barcaleta për të ilustruar idetë e tij. Sipas kundërshtarëve, programi i tij thjesht nuk ekziston.
Triumfi i antipolitikës
Morales ka arritur të “ngasë” valën e indinjatës pas skandalit të korrupsionit të ish-presidentit Molina që tronditi vendin.
Mungesa e eksperiencës politike, akuza kryesore kjo e kundërshtarëve politikë, ishte në fakt, pika e tij e fortë. Tek ai zgjedhësit panë një “alien”, të huaj për klasën e lartë por me një kurrukulum, por sidomos të pastër nga ana penale dhe morale. Edhe origjina e tij ka luajtur rolin e saj në fitore.
Misioni i vështirë
Tashmë, Morales duhet të mbajë premtimet dhe të përballojë një krizë të madhe politike dhe institucionale në vend. Në një Guatemalë ku 25 për qind e popullsisë jeton në kushtet e varfërisë ekstreme, ai duhet të luftojë kundër korrupsionit. Të tjera beteja janë ato kundër dhunës dhe pasigurisë. “Guatemala ka demostruar se problemet mund të zgjidhen pa nevojën e armëve, pa plumba por me zbatimin e ligjeve”, mund të thuhet paraprakisht me zgjedhjen e komedianit Morales si president. /tesheshi.com/
