Quhet Donald dhe është një i pastrehë, por duart e tij transmetojnë emocione që vetëm artistët e mëdhenj arrijnë të përçojnë me muzikën. Donald është një endacak në Sarasota të Floridas. Ai luan në piano dhe jo vetëm.
Ka nisur të studiojë në rini në konservator, por nuk arriti kurrë të përfundonte shkollën. Ka humbur në mënyrë tragjike bashkëshorten dhe tani është në kërkim të të birit 18-vjeçar, prej të cilit ka humbur çdo gjurmë. Donald ka nisur të luajë në rrugë dhe nuk tërhiqet. E shikon aty nga mëngjesi deri në mbrëmje, mbi piano. Dashuria e tij për muzikën ka lindur përmes notave të “Come Sail Away”.
Deri më sot ka përdorur aftësitë e tij për të grumbulluar para, por tani ka arritur të gjejë persona, të cilët tentojnë ta ndihmojnë. Në sajtin gofundme.com njerëzit kanë filluar të mbledhin fonde në mënyrë që ai të mund të luajë në piano si çdo njeri normal.
Por më parë, Donaldit i duhet një shtëpi, të gjejë të birin dhe t’i kthehet jetës normale. Nisma, falë emocioneve të transmetuara nëpërmjet pianos, ka arritur të mbledhë 30 mijë dollarë. Ai ka komentuar këtë gjest në mënyrë shumë të thjeshtë duke thënë: “Zoti ju bekoftë! Faleminderit!”. /tesheshi.com/
