Austria është në qendër të një debati rreth origjinës së himneve “kombëtare” të shteteve të saj federale, pasi një grup shkrimtarësh dhe historianësh të shquar zbuluan prirjet naziste të kompozitorëve të tyre, raporton The Guardian.
Ata u bënë thirrje politikanëve rajonalë që të ndryshojnë disa nga himnet dhe të pranojnë rrënjët e melodive të epokës naziste.
Në një letër drejtuar krerëve të Austrisë së Epërme, Karinthisë, Austrisë së Poshtme dhe Salzburgut, grupi i autorëve u bëri thirrje atyre “të ndërmarrin veprime”, pasi himnet e katër nga nëntë provincat përmbajnë elemente komprometuese.
Në disa raste, kërkohet fshirja e strofave të tëra ose vargjeve të caktuara problematike, së bashku me kërkesën për të kryer kërkime historike mbi origjinën dhe kompozitorët e tyre.
Dy liderë lokalë në Karinthi, nga radhët e socialdemokratëve dhe të ekstremit të djathtë populist FPO, të cilët refuzuan të dorëzoheshin ndaj këtyre kërkesave, akuzuan autorët për “zhbërjen e historisë”.
Kufij të shkruar me gjak
Grupi i interesit të autorëve austriakë (IG Autorinnen Autoren) i mohoi këto akuza, duke theksuar se në të gjitha këto raste nuk bëhet fjalë për anulim të historisë.
“Ka të bëjë me shkëputjen nga antisemitizmi, racizmi, nacionalizmi dhe nacional-socializmi… duke siguruar që gënjeshtrat historike politike të shfuqizohen dhe, në skenarin më të keq, të mos ringjallen,” tha Grupi në një deklaratë.
Siç shtohet, më problematik është himni i Karinthisë, tekstin e të cilit e ka shkruar Agnes Millonig, e cila i përkiste radhëve të nazistëve dhe që përmban vargun “Ku i kemi shkruar kufijtë tanë me gjak”, si dhe “Është atdheu im i bukur” me referencë për Gjermaninë, të cilën Austria e aneksoi në vitin 1938. Një grup autorësh kërkuan që ky varg të shfuqizohej.
Sipas studiuesve historikë, kompozitori i himnit kombëtar të Salzburgut, Ernst Sompek, ishte gjithashtu një entuziast nazist, i cili iu bashkua partisë kur ishte ende ilegale dhe kompozoi muzikë të frymëzuar nga partia. /tesheshi.com/
