Një histori e çuditshme ka ndodhur në Durrës, ku drejtori i postës së Manzës është mashtruar për gati tre vite nga një vajzë 27-vjeçare, të cilës sipas kallëzimit në polici, i ka bërë dhurata në vlerën e 60 milionë lekëve.
Gjithçka ka ndodhur përmes rrjeteve sociale, ku vajza kishte një profil të rremë, ndërsa 30-vjeçari Brahush Ahmetaj shpresonte të lidhte jetën me 27-vjeçaren.
Sipas pretendimit të drejtorit të postës, ai nuk e ka takuar asnjëherë 27-vjeçaren, Enertila Beqja, madje nuk e ka parë asnjëherë në realitet, thjesht nga një foto profile, e cila ka rezultuar se nuk ishte e saja, por e një aktoreje.
Ndoshta këtu nis edhe “kurthi” për funksionarin e postës, që duke parë foton ka menduar se ajo është e vajzës që komunikonte virtualisht.
I riu i kërkonte martesë, ajo i kërkonte ndihmë financiare. 30-vjeçari ia niste me postë, gjithçka që ajo kërkonte, ndërsa në fund, 27-vjeçarja mbylli profiling e rrjetit social dhe nuk komunikonte me drejtorin e postës.
Më në fund ai kuptoi se kishte rënë preh e një mashtrimi, që i ka kushtuar as më shumë dhe as më pak, por plot 60 milionë lekë.
Policia nisi hetimet pas kallëzimit, ndërsa historia e treguar ndoshta i ka lënë pa fjalë.
Gjithsesi vajza është ndaluar, disa sende janë sekuestruar, por çështja nuk është aq e thjeshtë. Kjo për faktin se familjarëte 27-vjeçares duket se po mbrojnë atë çka ajo ka përfituar. Në dëshmitë e dhëna në polici, që janë zbardhur nga mediat, prindërit e saj, pretendojnë se djali i ka dhënë me dëshirë dhuratat.
“Nuk kemi pasur dijeni në lidhje me historinë e vajzës. S’kemi marrë asnjëherë dhurata nga askush. Nuk e dimë çfarë po ndodh me vajzën tonë. Edhe nëse ka pasur lidhje dhe ka marrë dhurata, ajo nuk i ka vënë pushkën në kokë atij djali.
Ka dashur t’i blejë dhurata, ia ka blerë. Nuk e shtyu njeri me zor. Shtëpinë e kemi bërë me forcat tona, e kemi mobiluar modestisht me forcat tona. Ça ka blerë ai për vajzën, rroba, bizhuteri, këpucë apo çanta, kjo është puna e tij. Ato merrini, ndërsa me të tjerat nuk keni punë”, kanë deklaruar në polici. /tesheshi.com/
