Në votimet e dyta për kandidatët e republikanëve dhe demokratëve për president të SHBA-ve fitues janë Donald Trump dhe Bernie Sanders.
Donald Trump, miliarderi polemizues, rikthehet të fitojë bindshëm mes kandidatëve republikanë, duke lënë në vend të dytë guvernatorin e Ohio-s, John Kasich. Ky ishte rivali më i afërt i Trump-it në këto votime.
Gjuha e ashpër e Trump-it, deklaratat e tij bombastike, qëndrimi kundër emigrantëve të paligjshëm dhe kërkesa për t’i ndaluar muslimanët të hyjnë në SHBA i kanë dhënë efektet te republikanët, duke e bërë atë të jetë kandidati kryesor i tyre në fushatën parazgjedhore.
Me 35 për qind kryeson Trump-i kur duhet edhe pak gjë që të mbarojë numërimi. Kasich ka 16 për qind të votave, e Cruz 12 për qind. Ted Cruz ishte fituesi i votimeve në Iowa ditë më parë.
Te demokratët, senatori Bernie Sanders kryeson bindshëm, duke e lënë pas në mënyrë të dukshme ish-sekretaren amerikane të Shtetit, Hillary Clinton.
Ndryshe ekuilibrit të jashtëzakonshëm në Iowa, në New Hampshire votat për senatorin Sanders janë te 60 për qind, kundrejt 38 përqindëve të Hillary Clinton-it.
Trump udhëhiqte që nga korriku i vitit të shkuar në anketimet në New Hampshire, kurse Sanders kryesoi te demokratët gjatë muajit të fundit. /tesheshi.com/
