Rusia ndalon komedinë britanike “ekstremiste” Vdekja e Stalinit. Filmi i Armando Iannucci-it nuk ia del edhe aq mirë me politikanët dhe publikun elitë.
Transmetimi në Rusi i komedisë britanike “Vdekja e Stalinit” është ndalur, pas premierës përpara figurave të larta dhe një publiku elitë. Të ftuarit rusë u ankuan se satira përmbante “luftë ideologjike” dhe “ekstremizëm”.
Çertifikata që lejonte shpërndarjen e filmit në Rusi u tërhoq nga autoritetet, duke bërë që të anulohet premiera e tij e planifikuar për të enjten. Nuk është e qartë nëse filmi, ku luajnë Steve Buscemi dhe Jeffrey Tambor, do të ketë ndonjë shans për t’u shfaqur në Rusi.
Ministria e Kulturës tha për agjencinë e lajmeve Interfax se kishte informuar për vendimin kompaninë ruse të shpërndarjes së filmit. “Vendimi nëse do të shfaqet do të merret më pas”, tha ministria.
Filmi nga regjisori Armando Iannucci, është një satirë për luftën për pushtet në Moskë pas vdekjes së diktatorit sovjetik, Jozef Stalin në vitin 1953. Si rezultat, shumë prej personazheve kryesore jane figura reale historike.
Shfaqja e parë e filmit për një publik të zgjedhur, u përcoll nga anëtarë të parlamentit rus dhe përfaqësues të kinemasë ruse. Shumë prej tyre ishin të pakënaqur me atë që ndoqën.
Yelena Drapeko, kryetare e komitetit të kulturës në dhomën e ulët të parlamentit rus tha për televizionet ruse se ajo “nuk kishte parë asgjë më të neveritshme në jetën time”.
Yury Polyakov, këshilltar në ministrinë e Kulturës, tha se përmbante aspekte të “luftës ideologjike”.
Si për të shtuar kundërshtitë, shkurti është edhe përvjetori i fitores ruse në betejën e Stalingradit në vitin 1943 – një nga betejat më të mëdha në historinë ushtarake dhe një fitore vendimtare kundër nazistëve gjermanë.
Beteja u drejtua nga marshalli Georgy Zhukov, i cili luhet në komedi nga Jason Isaacs.
Vajza e marshall Zhukovit ishte një prej 21 firmëtarët e letrës së hapur ndaj ministrit të Kulturës, Vladimir Medinsky, ku shpreheshin ankesa për filmin. Në letër, kritikohej komedia për parodizimin e historisë së vendit dhe denigrimin e kujtimit të qytetarëve rusë që luftuan kundër nazistëve.
Filmi fyen popullin rus, thonë firmëtarët, dhe madje, edhe himni kombëtar rus- që shfaqet në trajler- është përdorur në mënyrë të papërshtatshme.
Ministri Medinsky, më pas, reagoi ndaj kundërshtive duke thënë: “Shumë njerëz të brezit më të vjetër, dhe jo vetëm ata, do ta shohin si një ngacmim ofendues ndaj gjithë së kaluarës sovjetike, ndaj vendit që mposhti fashizmin dhe ndaj gjithë njerëzve të zakonshëm, e ç’është më e keqja, edhe ndaj vetë viktimave të stalinizimit”.
“Ne nuk kemi censurë”, shtoi ai. “Ne nuk kemi frikë nga vlerësimet kritike dhe të pakëndshme të historisë sonë”.
Por, Armando Iannucci thotë se ka ende besim se filmi i tij do të shfaqet në Rusi dhe se reagimet nuk reflektohen në gjithë popullatën ruse.
“Të gjithë rusët që e kanë parë filmin deri tani, përfshirë edhe median ruse, kanë thënë se e kanë shijuar dhe vlerësuar filmin”, tha ai për “The Guardian”.
“Ata thonë dy gjëra: është qesharake, por është e vërtetë”.
Përgatiti: Juli Prifti – /tesheshi.com/
