Në Mitrovicë është hequr dhe barrikada e fundit, ajo që i përkiste banorëve shqiptarë, në udhëkryqin kryesor në “Lagjen e Boshnjakëve”. Kryetari komunës, ama i vetëm pjesës jugore të qytetit të ndarë, edhe pse pa barrikada tashmë, Agim Bahtiri, tha se ky është një sinjal që qyteti po bashkohet.
“Sot po hiqet edhe kjo pjesa që është quajtur sheshi ‘Adem Jashari’ dhe tashmë çdo qytetar mund të lëvizë lirshëm në Mitrovicë. Heqja e barrikadës mbrëmë ka dhënë një sinjal që qyteti po bashkohet dhe duhet të punohet që një herë e përgjithmonë të ndalim këto dallime”, tha Bahtiri.
Barrikada ishte një cilindër të betoni, i vënë në “Lagjen e Boshnjakëve” si një kundërpërgjigje e banorëve shqiptarë ndaj një vendimi të organeve komunale të Mitrovicës së veriut për ndërtimin e sheshit “Princ Lazari”, në vitin 2014.
Simbol i ndarjes së Mitrovicës ka qenë ura kryesore e Ibrit, e cila tashmë është çliruar dhe i është nënshtruar një rikonstruksioni. Por edhe pa këto pengesa fizike, Mitrovica mbetet etnikisht një qytet i ndarë që pas përfundimit të luftës, me shqiptarët në jug e serbët në veri, të cilët shihen ndërsjelltazi si armiq të përbetuar. /tesheshi.com/
